ԱՄՆ պետքարտուղարության մամուլի խոսնակ Նեդ Փրայսն իր ճեպազրույցի ժամանակ անդրադարձել է ԼՂ-ում մարտի 5-ին տեղի ունեցած միջադեպին ու հայտարարել, որ վեճերի լուծման նպատակով ուժի կիրառումը երբևէ չի կարող ընդունելի լինել։
«Մենք հետևում ենք մարտի 5-ին Լեռնային Ղարաբաղի տարածքում 5 անձանց կյանք խլած փոխհրաձգության միջադեպի մասին հաղորդումներին։ Մենք զորակցություն ենք հայտնում զոհվածների ու վիրավորվածների ընտանիքներին։ Հակամարտությունը չի կարող ռազմական լուծում ունենալ և վեճերի լուծման նպատակով ուժի կիրառումը երբևէ չի կարող ընդունելի լինել։ Խաղաղության պահպանման միակ ճանապարհը բանակցային սեղանի շուրջ աշխատելն է, իսկ ուժի կիրառումը խաթարում է բանակցությունները։ Կովկասյան բանակցությունների հարցերով ավագ խորհրդական Լու Բոնոն տարածաշրջանում է՝ ընդգծելու, որ առաջընթացի միակ ճանապարհը ուղղակի երկխոսությունն է և դիվանագիտությունը։ Եվ ինչպես Պետքարտուղարն է ընդգծել, Միացյալ Նահանգները հանձնառու է աջակցել հայ-ադրբեջանական խաղաղության բանակցություններին»,- հայտարարել է Նեդ Փրայսը՝ նշելով, որ ԱՄՆ հստակ ուղերձն է ուղիղ երկխոսության շարունակումը։
«Մեզ համար ամենահստակ ենթատեքստը կողմերի միջև շարունակական ուղիղ երկխոսության և քննարկման հրամայականն է։ Մենք երկու երկրների համար էլ գործընկերոջ դեր ենք կատարել՝ նպաստելով եռակողմ ձևաչափով ներգրավվածությանը արտաքին գործերի նախարարների և ղեկավարների մակարդակով: Մենք պատրաստ ենք շարունակել գործընկեր լինել կայուն խաղաղություն ապահովելու ջանքերի առաջմղման գործում՝ լինի երկկողմ, եռակողմ, բազմակող ձևաչափով»,-ասել է Փրայսը:
Անդրադառնալով Բաքվում ՌԴ ԱԳՆ ղեկավար Սերգեյ Լավրովի հայտարարությանը, թե հակամարտության լուծման համար անհրաժեշտ է հավատարիմ մնալ ՌԴ միջնորդական ջանքերին՝ Փրայսը հայտարարել է, որ ԱՄՆ-ն դեմ չէ որևէ այլ երկրի միջնորդական ջանքերին։
«Սա հենց կողմերի հարցն է, և մենք չենք պատրաստվում դեմ լինել միջնորդության որևէ այլ առաջարկի, և իրականում մենք միջնորդ չենք: Մենք երկու երկրների գործընկերն ենք։ Կարծում եմ՝ մենք և՛ խոսքով, և՛ գործով ցույց ենք տվել երկու երկրների հետ մեր հարաբերությունների բնույթը, երկու երկրներին միավորելու մեր կարողությունը, մեր պատրաստակամությունը՝ օգնելու լրացուցիչ առաջընթաց ապահովել Հայաստանի և Ադրբեջանի միջև հարաբերություններում։ Մենք դա չենք անում որպես Մոսկվայի հետ մրցելու միջոց։ Մենք դա անում ենք՝ ձգտելով հասնել այս երկու երկրների միջև երկարատև վեճի կարգավորմանն ու լուծմանը, ցավոք, մի վեճի, որը հետևողականորեն մարդկային կյանքեր է խլում, ինչպես դա եղավ մարտի 5-ին: Մեր շահն այստեղ խաղաղության և անվտանգության մեջ է։ Դա բխում է նաև Հայաստանի և Ադրբեջանի ժողովրդի շահերից»,- եզրափակել է ամերիկացի պաշտոնյան։
– –
