Այս թեման քննարկման առարկա է բարձր մակարդակով շփումների ընթացքում ինչպես Մոսկվայում, այնպես էլ Երեւանում։
ՌԴ ԱԳՆ պաշտոնական ներկայացուցիչ Մարիա Զախարովան այսօր շաբաթական ճեպազրույցում անդրադարձել է Հռոմի ստատուսին Հայաստանի միանալու հարցին։
Նա նշել է, որ այս թեման քննարկման առարկա է բարձր մակարդակով շփումների ընթացքում ինչպես Մոսկվայում, այնպես էլ Երեւանում։
«Հարկ չեմ համարում բացահայտել այդ շփումների մանրամասները։ Իհարկե, ենթադրում ենք, որ այդ հարցը կկարգավորվի դաշնակցային եւ փոխադարձ ընդունելի ձեւով»,- ասել է Զախարովան։
Նշենք, որ մարտի 24-ին Հայաստանի Սահմանադրական դատարանը հրապարակել է «Սահմանադրությանը Միջազգային քրեական դատարանի Հռոմի ստատուտում ամրագրված պարտավորությունների համապատասխանության հարցը լուծելու մասին» որոշումը։
Ըստ ՍԴ-ի՝ Միջազգային քրեական դատարանի իրավասության հետադարձ ընդունման մասին հռչակագրով սահմանված պարտավորությունները համապատասխանում են Սահմանադրությանը։
Որոշումը վերջնական է եւ ուժի մեջ է մտնում հրապարակման պահից։
Հայաստանի կառավարությունը 2022 թվականի վերջին այս հարցով դիմել էր Սահմանադրական դատարան։ Ստատուտի ճանաչման հարցին դիմելը, ըստ կառավարության, պայմանավորված է նրանով, որ հնարավորություն կա Ադրբեջանին պատասխանատվության կանչել ռազմական հանցագործությունների համար։ Կանոնադրությունը ստորագրվել է 1998 թվականին, սակայն մինչ օրս Հայաստանի Հանրապետությունը այն չի վավերացրել, քանի որ 2004 թվականին Սահմանադրական դատարանը պայմանագրի պարտավորությունները հակասող է ճանաչել ՀՀ այն ժամանակ գործող Սահմանադրության մի շարք դրույթներին։
Նշենք, որ Միջազգային քրեական դատարանի նախաքննական պալատը ՌԴ նախագահ Վլադիմիր Պուտինին եւ երեխաների իրավունքների հանձնակատար Մարիա Լվովա-Բելովային ձերբակալելու որոշում էր կայացրել։ Նրանց կասկածում են Ուկրաինայից երեխաների անօրինական դուրս բերելուն մասնակցության մեջ։
–
