Իրանը կարծում է, որ ադրբեջանական կողմի գործողությունները պերսոնա նոն գրատա հայտարարված իրանցի դիվանագետների նկատմամբ հակասում են բարիդրացիության սկզբունքներին։ ՏԱՍՍ-ը հատնում է, որ այդ մասին ուրբաթ օրը հայտարարել է Իսլամական Հանրապետության արտաքին գործերի նախարարության պաշտոնական ներկայացուցիչ Նասեր Քանանի Չաֆին։
«Մենք գտնում ենք, որ Ադրբեջանի Հանրապետության կառավարության այս պահվածքը հակասում է բարիդրացիության սկզբունքներին»,-մեջբերում է Իրանի ԱԳՆ-ն իր Telegram ալիքում։
Իրանի ԱԳՆ ներկայացուցիչը կոչ է արել Բաքվին «փոխադարձ հարգանք ցուցաբերել, շարժվել դեպի բարիդրացիություն», ինչպես նաև «հեռու մնալ» «տարածաշրջանի թշնամիներից», այդ թվում՝ Իսրայելի «սիոնիստներից»։
Ապրիլի 6-ին Ադրբեջանի ԱԳՆ-ն հայտարարել էր, որ Բաքվում Իրանի դեսպանատան չորս աշխատակիցներ հայտարարվել են պերսոնա նոն գրատա, նրանց հանձնարարվել է 48 ժամվա ընթացքում լքել Ադրբեջանի տարածքը։ Իրանի դեսպանին արտահայտվել է «վճռական դժգոհություն Ադրբեջանի դեմ իր երկրի վերջին սադրիչ գործողությունների կապակցությամբ»։
Բաքվի և Թեհրանի հարաբերությունները հատկապես սրվել են այս տարվա հունվարին Իրանում Ադրբեջանի դեսպանատան վրա տեղի ունեցած զինված հարձակումից հետո, որի հետևանքով զոհվել է դիվանագիտական առաքելության անվտանգության պետը և վիրավորվել նրա երկու գործընկերները։ Դեպքից հետո դեսպանատունը դադարեցրել է դիվանագիտական գործունեությունը, իսկ նրա աշխատակիցներն ու նրանց ընտանիքները տարհանվել են Ադրբեջան։
