Թուրքիան հավելյալ միջոցներ կձեռնարկի, եթե չապամոնտաժվի «Նեմեսիսի» հուշակոթողը. Չավուշօղլու

Թուրք արտգործնախարարի խոսքով Թուրքիան չի բավարարվի միայն  օդային տարածքի փակումով, կշարունակի հավելյալ միջոցներ ձեռնարկել, եթե չապամոնտաժվի «Նեմեսիսի» հուշակոթողը։

Թուրքական ТЕМ-ի ուղիղ եթերում Թուրքիայի արտգործնախարար Մևլութ Չավուշօղլուն մեկնաբանել է «Նեմեսիս» գործողությունը կազմակերպած հայ վրիժառուներին նվիրված աղբյուր-հուշակոթողի տեղադրումը Երևանում, ինչպես նաև խոսել ղարաբաղյան հիմնախնդրից ու առաջ քաշել մի շարք անհիմն պնդումներ․

«Անշուշտ, ուղիղ թռիչներ կան։ Մեր «Պեգասուս»-ն է, կարծեմ, թռչում այս պահին։ Մեր օդային տարածքով Եվրոպա ու այլ վայրեր են թռչում։ Միայն Հայաստանի խորհրդարանի ղեկավարին թույլ տվեցինք Թուրքիա գալ, քանի որ Սևծովյան տնտեսական համագործակցության խորհրդարանական վեհաժողովը միջազգային հավաք է, դա բացառություն է, մինչդեռ, դրանից բացի, VIP թռիչքները ներառյալ, թռիչքներ այլևս թույլ չենք տալու», – հավելել է Չավուշօղլուն։

Այնուհետ Չավուշօղլուն սպառնացել է, որ Թուրքիան չի բավարարվի միայն օդային տարածքի փակումով, կշարունակի հավելյալ միջոցներ ձեռնարկել, եթե չապամոնտաժվի «Նեմեսիսի» հուշակոթողը։ «Անհնար է, որ մենք դա ընդունենք։ Հստակ կերպով տեսանք, որ նրանք բարի մտադրություն չունեն։ Ներողություն, բայց թող չասեն, թե դա մեր լիազորությունը չէ, թող չփորձեն մեզ խաբել»,- եզրափակել է Թուրքիայի արտգործնախարարը։ Այդ մասին հայտնում է «Ermenihaber»-ը։