ՀՀ պաշտպանության նախարարությունը e-draft.am կայքում ներկայացրել է 2023թ. օգոստոսի 1-ից մինչև հոկտեմբեր 13-ը Հայաստանում պահեստազորայինների վարժական հավաքներ անցկացնելու նախագիծ։
Նախագծի համաձայն՝ վարժական հավաքներին, ընդհանուր առմամբ, կներգրավեն մինչև 2352 քաղաքացու, որոնցից 2115-ը՝ շարքային և կրտսեր ենթասպայական կազմերի, 110-ը` ավագ ենթասպայական կազմի, 127-ը` սպայական կազմի պահեստազորայիններ՝ համազորային (մոտոհրաձգային, կապի, հետախուզական, ինժեներական), հրթիռահրետանային մասնագիտություններով:
Նշվում է, որ հայտարարված վարժական հավաքների ընթացքում յուրաքանչյուր քաղաքացի ներգրավվում է ոչ ավելի, քան 25 օրացույցային օր ժամկետով:
Վարժական հավաքների ապահովման համար նախագծով նախատեսվում է նաև 2023 թվականի օգոստոսի 1-ից մինչև հոկտեմբերի 13-ը ներառյալ, ռազմատրանսպորտային պարտականություններ ունեցող մարմիններից ներգրավել մինչև 205 միավոր տրանսպորտային միջոց՝ յուրաքանչյուր տրանսպորտային միջոցի ներգրավումը ոչ ավելի, քան 7 օրացույցային օր ժամկետով, բացառությամբ ճանապարհաշինարարական տրանսպորտային միջոցների, որոնց ներգրավումը ոչ ավելի, քան 25 օրացուցայի օր ժամկետով՝ համաձայն հավելվածի:
