Սպառնացել է նռնակով պայթեցնել

Հայտնաբերվել է նաև կանեփանման զանգված, դեղնականաչավուն հեղուկ և ներարկիչ։

Գեղարքունիքի մարզի Լեռնակերտ գյուղում տղամարդը սպառնացել է 2 մարտական նռնակ պայթեցնել և սպանել ընտանիքի անդամներին։ Տեղեկությունը հայտնում է shamshyan.com-ը։

Միջադեպը տեղի է ունեցել հունիսի 8-ին` ժամը 21։20-ի սահմաններում։ Քաղաքացին ահազանգել է ոստիկանություն, օպերատիվ կառավարման կենտրոնի ծառայողը հեռախոսի մյուս կողմում լսել է կնոջ և երկու տղամարդու վիճաբանության, բղավոցի ձայներ, լսել է նաև, որ տղամարդկանցից մեկն ասում է, որ մյուսի մոտ նռնակ կա։ Դեպքի վայր մեկնած իրավապահները պարզել են, որ ահազանգը եղել է Լեռնակերտ գյուղի բնակիչ Կառլեն Մ․-ի բնակարանից։

«Իրավապահները պարզել են, որ 40-ամյա Կառլեն Մ․-ն և 45-ամյա Արտյոմ Մ․-ն հաճախակի վիճաբանություն են ունենում ընտանիքում, ծեծում, բռնություն կիրառում, երբեմն էլ սպառնում են, որ նռնակով կպայթեցնեն։ Երեկ, ժամը 20։00-ի սահմաններում Արտյոմ Մ․-ն` 2 նռնակը ձեռքին, հարբած մտել է տուն, ծեծի ենթարկել ընտանիքի անդամներին և սպառնացել, որ նռնակներով կպայթեցնի ու կսպանի նրանց, ապա դուրս է եկել տնից»,– հայտնում է կայքը։

Ոստիկանները քննության ընթացքում խոտերի մեջ հայտնաբերել են կասկածելի պոլիէթիլենային տոպրակ, որի մեջ եղել է 2 հատ «Ֆ-1» նռնակ։ Կառլեն Մ․-ն նաև առանձնատնից քիչ հեռու ոստիկաներին և քննիչներին ներկայացրել է 1 հատ 4 լիտրանոց տարա, որի մեջ եղել է 181 գրամ մաքուր քաշով դեղնականաչավուն, կանեփանման, մանրացված զանգված և 1 հատ 3 լիտրանոց տարա, որի մեջ էլ եղել է դեղնականաչավուն հեղուկ։ Հայտնաբերվել է նաև կանեփի զանգված ծխելու համար, տարբեր չափերի պլաստմասսե շշեր և 1 հատ ներարկիչ։ Հայտնաբերվածները պատկանել են Արտյոմ Մ.–ին։

Դեպքի փաստով նախաձեռնվել է վարույթ։

Արտյոմ Մ․-ն հայտնաբերվել և ձերբակալվել է, ապա տեղափոխվել ոստիկանության Մարտունու բաժին, որտեղից էլ նրան ներկայացրել են Մարտունու քննչական բաժին։