Ռոբերտ Ղուկասյանը՝ Գորիսի պետական համալսարանի խորհրդի նոր նախագահ

Ղուկասյանը շեշտեց, որ հատկապես այս դժվարին օրերին, երբ մեր տարածաշրջանը աշխարհաքաղաքական ծանր փուլում է, մեզ արագ զարգացում է պետք, իսկ դա անհնար է առանց կրթական ոլորտի զարգացման։

Գորիսի պետական համալսարանի (ԳՊՀ) խորհուրդը սեպտեմբերի 8-ի նիստում իր կազմից ԳՊՀ խորհրդի նոր նախագահ ընտրեց (14 կողմ, 1 դեմ ձայներով) Սյունիքի մարզպետ Ռոբերտ Ղուկասյանին։ Այս մասին տեղեկանում ենք Սյունիքի մարզպետարանի աշխատակազմի ֆեյսբուքյան էջից։

Իր պարտականությունները ստանձնելիս՝ Սյունիքի մարզպետը մասնավորապես ասել է․ «Շնորհակալ եմ իմ թեկնածությունն առաջադրելու և վստահության համար։ Սա, իհարկե, շատ պատասխանատու պահ է ինձ համար, որովհետև իմ թեկնածությունն առաջարկելիս՝ նաև հիմնավորումներ ներկայացրիք․․․ Մեծ պարտավորվածություն կա այս ամենում և վստահեցնում եմ, որ կանեմ առավելագույնը, որպեսզի Գորիսի պետական համալսարանի համբավն ու պատիվը բարձր պահվեն և՛ առկա բոլոր մարտահրավերներին դիմակայելու, և՛ բուհի սահուն զարգացման մեջ իմ ներդրումն ունենալու գործում։ Գիտեմ, որ բուհի առջև ծառացած են նաև բազմաթիվ խնդիրներ, որոնց դեռ ծանոթ չեմ, բայց կծանոթանամ ու ամեն ինչ կանեմ, որ դրանք օր առաջ լուծվեն, և կարողանանք ԳՊՀ-ի համար ապահովել այնպիսի ընթացք, որի մասին մեր տարբեր զրույցներում և քննարկումներում միշտ նշել ենք։

Երկրագնդի վրա ու ընդհանրապես բանական մարդու համար կրթությունն ամենակարևոր հենասյունն է զարգացման գործում, ուստի ամենամեծ շեշտադրումն էլ պետք է արվի կրթության որակի և հասանելիության վրա։ Հատկապես այս դժվարին օրերին, երբ մեր տարածաշրջանը աշխարհաքաղաքական ծանր փուլում է, մեզ արագ զարգացում է պետք, իսկ դա անհնար է առանց կրթական ոլորտի զարգացման։ Ես կաշխատեմ հնարավորինս հաճախակի լինել այստեղ, ու ամեն ինչում աջակցել Գորիսի պետական համալսարանին, պաշտպանել բուհի շահերը։

Եվս մեկ անգամ շնորհակալ եմ վստահության համար»։