Փաստաթուղթը պետքարտուղարությունից պահանջում է մշակել մանրամասն ռազմավարություն։
ԱՄՆ ներկայացուցիչների պալատի Մարդու իրավունքների հարցերով գլոբալ ենթակոմիտեի նախագահ Քրիս Սմիթը օրինագիծ է ներկայացրել՝ ուղղված Լեռնային Ղարաբաղում Ադրբեջանի կողմից վայրագությունների և էթնիկ զտումների կանխմանը: Օրինագծի համահեղինակներն են կոնգրեսականներ Բրեդ Շերմանը, Գուս Բիլիրակիսը, Ջիմ Կոստան և Ֆրենկ Հիլը:
Փաստաթուղթը պետքարտուղարությունից պահանջում է մշակել մանրամասն ռազմավարություն՝ Լեռնային Ղարաբաղում էթնիկ հայերի երկարաժամկետ անվտանգության և բարեկեցության խթանման համար, մասնավորապես.
- ԱՄՆ դիվանագետներին տարածաշրջան գործուղում՝ իրավիճակը վերահսկելու և հետագա ճնշումների մասին անհապաղ տեղեկացնելու համար.
- Հայկական մշակութային ժառանգության օբյեկտների 24-ժամյա տեսահսկման ներդրում.
- Լեռնային Ղարաբաղի վրա վերջին հարձակման և շրջափակման հետևանքով տուժած հայերին մարդասիրական օգնության թույլտվություն.
- Լեռնային Ղարաբաղի շրջափակումը և հարձակումը ղեկավարած պաշտոնատար անձանց նկատմամբ նոր պատժամիջոցների սահմանում.
- Օտարերկրյա ռազմական ֆինանսավորման տրամադրում ժողովրդավարական Հայաստանին, որին ներկայումս սպառնում է Ադրբեջանը.
- ԱՄՆ-ի կողմից Ադրբեջանին տրամադրվող ռազմական օգնության դադարեցում՝ «Ազատության աջակցության մասին» օրենքի 907-րդ հոդվածի նախագահի վերապահումը վերացնելու միջոցով:
«Ցավոք, ԼՂ հայերը ստիպված են եղել զինաթափվել և իրենց անկախությունը զիջել անողոք բռնապետին, որի կառավարությունը տարիներ շարունակ սարսափելի ճնշումներ է գործել նրանց նկատմամբ, արտահայտել է էթնիկ զտման իր կամքը և նույնիսկ Լաչինի միջանցքի շրջափակմամբ սովի մատնելու միջոցով ցեղասպանություն է նախաձեռնել: Լեռնային Ղարաբաղում ապրող հայերը, ինչպես միշտ, իրավունք ունեն շարունակել ապրել իրենց հին հայրենիքում և դա անել անվտանգ»,- ասել է Սմիթը:
