1975 թվականին բրիտանական Vogue ամսագրի նկարահանող խումբը եղել է Հայաստանում: Ամսագրում է հայտնվել Երեւան-Սեւան մայրուղում գտնվող «Արշալույս» մոնումենտալ քանդակը, որի հեղինակը քանդակագործ Արա Հարությունյանն է:
Նկարահանումն արել է հեղինակավոր լուսանկարիչ Նորման Փարքինսոնը, իսկ կադրում մոդել, դերասանուհի Ջերի Հոլն է՝ ռոք-աստղ Միք Ջագերի նախկին կինը:
Նկարահանող խումբը եղել է նաեւ Սեւանի ափին, որտեղ լուսանկարվելիս Հոլը կրել է Yuki ապրանքանիշի լողազգեստ, Britmarine գլխարկ ու Manolo Blahnik-ի սանդալներ: Կադրերը լույս են տեսել 1976 թվականին բրիտանական Vogue-ի հունվարյան համարում:
Ամսագիրը որոշել էր բացահայտել «Երկաթե վարագույրի» հետեւում գտնվում Խորհրդային Միությունը: Նկարահանող թիմում էին Փարքինսոնն ու նրա կինը՝ Վենդան, որը նախկին մոդել էր ու գրում էր ամսագրի համար, 18-ամյա Ջերի Հոլը, ամսագրի երկար տարիների աշխատակից Գրեյս Քոդինգթոնը եւ նկարիչ-դիմահարդար Ժերմեն Մոնտեյը:
Մինչ այդ գլամուրային արտասահմանյան ամսագրերը ԽՍՀՄ-ում երբեւէ նկարահանումներ չէին արել: Փարքինսոնն ու նրա թիմը ջերմ ընդունելության են արժանացել:
«1970-ականների կեսերն էին, շրջում էինք ուղեկցողների հետ, նկարելուց հետո ժապավենը մեզնից վերցնում էին, ինչն անհանգստացնում էր Փարքսին՝ վախենում էր, որ սխալ կվարվեն, ու կադրերը կփչանան: Դրա համար էլ ինձ խնդրեց դրանք թաքցնել տաբատիս մեջ: Հետո, իհարկե, ժապավենը հանձնեցինք նրանց: Հետո ամուսինս խոստովանեց, որ ռուսներն ավելի լավ են երեւակել ժապավենը, քան՝ իրենք»,- պատմել է մոդելը:
Փարքինսոնն իր մասին միշտ նշել է, որ արհեստավոր է, ոչ թե նկարիչ: Իր կարիերայի ողջ ընթացքում նա դիմանկարների ու նորաձեւության ոլորտի ամենահեղինակավոր մասնագետներից մեկն էր համարվում: Նրա աշխատանքները բրիտանական նորաձեւության աշխարհում հեղափոխական են դարձել՝ մոդելներին տաղավարային նկարահանումներից տեղափոխելով բաց երկնքի տակ: Հայաստանյան նկարահանումն էլ դրա վկայություններից մեկն է: Փարքինսոնի աշխատանքների առանցքային կողմերից մեկը հումորն է եղել, ինչն ավելի է գրավել ամսագրի ընթերցողներին:
bravo.am
