ԱԺ նախագահը նշեց՝ Ադրբեջանը հարձակման մասին բացեիբաց հայտնել է։
ԱԺ նախագահ Ալեն Սիմոնյանը խոստովանում է, որ չկա երաշխիք, որ Տավուշից հողեր զիջելուց հետո Ադրբեջանն էլ դուրս է գալու Հայաստանին պատկանող օկուպացված տարածքներից:
«Ես չեմ կարող նման երաշխիքների մասին խոսել, բայց կարող եմ ասել, որ այդ պրոցեսը պետք է հայելային տրամաբանության մեջ տանենք.,-ասաց նա ԱԺ-ում լրագրողների հետ զրույցում:
«Այդ կետը, որտեղից սահմանը պետք է ուրվագծվի, մեր կարծիքով, ճիշտ է Տավուշից սկսել, որովհետեւ այնտեղ վիճելի մասըերը քիչ, թե շատ ավելի քիչ են, քան մնացած առումով: Կարծում եմ՝ այս պրոցեսի շնորհիվ մենք կունենանք լրիվ սահմանի ուրվագիծը»,-ասաց նա:
Անդրադառնալով նրան, որ եթե Հայաստանը չհանձննի այդ գյուղերը, Ադրբեջանը սպառնում է պատերազմով, նա ասաց. «Ես չեմ բացառում, որ կհարձակվեն: Իսկ ինչի՞ չհարձակվեն: Ես կարծում եմ՝ իրենք դա բաց ասել են: Իհարկե, մենք պատրաստ ենք եւ այնպես չէ, որ մենք այդ տրամաբանությունից ենք ելնում, որ մեր ընդդիմադիրներն ասում են՝ ամեն ինչ տալիս են: Ոչ, եկեք ֆիքսենք, որ Հայաստանի տարածքից որեւէ բան մենք նույնիսկ սակարկման մեջ չենք մտնում:
Արդեն երկու տարի է միջանցքի մասին է խոսվում, բա ինչի՞ մենք այդ հարցում զիջման չգնացինք: Որովհետեւ ակնհայտ է, որ դա մեր իրավասության գոտում է: Բայց այն, որ ինչ-որ տեղից քարտեզագրումը պետք է սկսվի, ու ինչ-որ ձեւով արվի, ակնհայտ է»:
ԱԺ նախագահը վստահեցրեց, որ սահմանազատումը Տավուշից սկսելը Հայաաստանի համար էլ է ընդունելի. «Մեզ հմար էլ այդ տարածքում շատ ու շատ տեղեր պարզ են եւ մեծ հաշվով, այնտեղ շատ մեծ վեճ չկա: Մնացած մասերում վեճ կա»:
