Արցախի նախկին նախագահի հարցազրույցը նախատեսվում էր ցուցադրել մարտի 28-ին։
Ադրբեջանական AzTV պետական հեռուստաալիքը մեկնաբանել է՝ ինչու մարտի 28-ին եթեր չհեռարձակվեց Արցախի նախկին նախագահ Արայիկ Հարությունյանի հետ հարցազրույցը, որին մասին հայտարարվել էր դեռ ամսվա սկզբին, հայտնում է Sputnik Արմենիան։
Հեռուստաալիքի մամուլի քարտուղար Ռուֆաթ Սեիդովն ասել է՝ թեպետ նախապես հայտարարվել էր, որ հարցազրույցը եթեր կհեռարձակվի մարտի 28-ին, ծանուցման մասին հաղորդագրություն ավելի ուշ հեռացվել է AzTV-ի սոցիալական ցանցերի էջերից:
«Հարցազրույցի հեռարձակումը միայն մեզանից կախված չէ։ Մենք կանգնած ենք մի հարցի առաջ, թե որքանով է նպատակահարմար հարցազրույցը հրապարակել հիմա։ Երեկ մենք նույնիսկ չենք էլ հայտարարել, որ հարցազրույցը կցուցադրվի երեկոյան եթերում։ Ճիշտ է, մարտի սկզբին մենք ծանուցում էինք հեռարձակել, բայց ավելի ուշ պարզվեց, որ հարցազրույցի հրապարակման հետ կապված որոշակի հստակեցումներ են անհրաժեշտ։ Այդ պատճառով հեռուստադիտողների շրջանում թյուրիմացությունից խուսափելու համար մենք հեռացրինք այդ հայտարարությունները սոցիալական ցանցերի մեր բոլոր էջերից»,- ասել է Սեիդովը։
Նա միաժամանակ նշել է, որ հարցազրույցը կհրապարակվի։ Երբ ամսաթիվը հայտնի դառնա, այդ մասին լրացուցիչ կտեղեկացվի:
Նշենք, որ հարցազրույցի փաստը դատապարտել են հայաստանյան իրավապաշտպան կազմակերպություններն ու քաղաքական կառույցները՝ հարկադրված զրույցը որակելով միջազգային կոնվենցիաների և նորմերի խախտում: Հայտնի է նաև, որ բացի Հարությունյանից, ադրբեջանական լրատվամիջոցները զրուցել են նաև Արցախի պաշտպանության բանակի նախկին հրամանատար, գեներալ Լևոն Մնացականյանի հետ։
