Այսօր ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստում ԿԳՄՍ նախարար Ժաննա Անդրեասյանը ներկայացրեց հանրակրթության մասին օրենքում առաջարկվող փոփոխությունները, որոնք մեծ չափով վերաբերում են դպրոցների կառավարմանը և ուսուցիչների ատեստավորման գործընթացին։
Դպրոցների կառավարման վերաբերյալ նախարարը նշեց, որ մենթոր դպրոցի սահմանումը տանում են օրենքի մակարդակ՝ սահմանելով, թե այն ինչ է նշանակում․ սրանով հավելյալ հնարավորություն կլինի՝ այլ դպրոցներին խրախուսելու։
«Տնօրենների և համակարգողների մասով կարևոր եմ համարում, որ օրենսդրական մակարդակում ավելի ենք հստակեցրել քաղաքական զսպվածության անհրաժեշտությունը։ Սա համարում եմ կարևոր հանձնառություն, որը հետևողականորեն իրականացնում ենք՝ կրթական համակարգը զերծ պահելու կուսակցականացման և քաղաքականացման այն ջանքերից, որոնք պարբերաբար տեսնում ենք, և որոնց վատ ավանդույթը, ցավոք, ունեցել ենք»,- ասաց Անդրեսյանը՝ հավելելով, որ համապատասխան հոդվածում ներառել են դրույթ, ըստ որի՝ տնօրենը և համակարգողը պարտավոր են դրսևորել քաղաքական զսպվածություն և իրենց պաշտոնեական դիրքը կամ աշխատանքային միջոցները չօգտագործել կուսակցությունների կամ հասարակական (այդ թվում՝ կրոնական) միավորումների շահերի, նրանց նկատմամբ վերաբերմունք քարոզելու կամ այլ քաղաքական/կրոնական գործունեություն իրականացնելու համար։
Ըստ նախարարի՝ այսպիսով վարքային պահանջ են սահմանում և համապատասխան սանկցիաների հնարավորություն տալիս. «Եթե որևէ մեկը կխախտի այս դրույթը, համապատասխան հետևանքները կկիրառվեն»։
