Հայաստանը կիսում է դիմակայուն, առավել ներառական ու կայուն ապագայի տեսլականը։
Հայաստանը ողջունում է սեպտեմբերի 22-ին Նյու Յորքում` ՄԱԿ կենտրոնակայանում, «Հանուն ապագայի դաշնագրի» ընդունումը, ասված է ՀՀ ԱԳՆ-ի տարածած հայտարարությունում։
«Հաշվի առնելով համաշխարհային և տարածաշրջանային մակարդակում առկա մարտահրավերները՝ Հայաստանն իր ներդրումն է ունեցել դաշնագրում այնպիսի հանձնառությունների արտացոլման գործում, ինչպիսիք են միջազգային մարդասիրական իրավունքի խախտումների, ցեզասպանության և մարդկության դեմ հանցագործությունների համար անպատժելությանը վերջ դնելը, ինչպես նաև ատելության խոսքի ու ապատեղեկատվության դեմ պայքարը։ Մենք բարձր ենք գնահատում այս ուղղությամբ մեր գործընկերների հետ սերտ փոխգործակցությունը։ Հայաստանը կիսում է դիմակայուն, առավել ներառական ու կայուն ապագայի տեսլականը»։
Հիշեցնենք, որ սեպտեմբերի 13-ին վարչապետ Նիկոլ Փաշինյանը ելույթ էր ունեցել ՄԱԿ Գլխավոր ասամբլեայի 79-րդ նստաշրջանի շրջանակներում կազմակերպվելիք Ապագայի գագաթնաժողովին ընդառաջ սեպտեմբերի 12-ին կազմակերպված գլոբալ արշավի ընթացքում, որն անցկացվել էր առցանց:
Իր ելույթում վարչապետը նշել է.
«Մեծարգո նախագահ Մբումբա,
Մեծարգո կանցլեր Շոլց,
Մեծարգո գլխավոր քարտուղար Գուտերեշ,
Տիկնայք և պարոնայք,
Ուրախ եմ այս բարձր մակարդակի միջոցառմանը ելույթով հանդես գալու հնարավորության համար և ներկայացնելու Հայաստանի ակնկալիքներն Ապագայի գագաթնաժողովից։
Ներկայումս, երբ աշխարհը բախվում է ծանր մարտահրավերների և բազմաթիվ ճգնաժամերի, Ապագայի գագաթնաժողովը կարևոր հնարավորություն է տալիս խթանելու հավաքական ջանքերը՝ երաշխավորելու, որ բազմակողմ համակարգն ապահովում է խաղաղություն, արդարություն, բարգավաճում և հարգանք մարդու իրավունքների նկատմամբ:
Միջազգային զարգացումների ներկայիս տեմպերը ցույց են տալիս, որ մենք դեռևս շարժվում ենք հակառակ ուղղությամբ, երբ ՄԱԿ-ը դեռ կարիք ունի կանխարգելման և հաշվետվողականության անհրաժեշտ գործիքների և մեխանիզմների՝ ընդդեմ միջազգային իրավունքի ոտնահարումների, հատկապես մարդու իրավունքների կոպտագույն խախտումների և ոճրագործությունների:
ՄԱԿ-ի Կանոնադրության և միջազգային իրավունքի հենքի վրա վերափոխված բազմակողմանիությունն է պատասխանը գլոբալ անվտանգության և զարգացման մարտահրավերներին՝ ի շահ ներկա և ապագա սերունդների՝ ապահովելու, որ բոլոր ձայները լսելի լինեն, և ոչ ոք հետևում չմնա:
Այս տեսանկյունից, «Հանուն ապագայի» դաշնագիրը կարևոր փաստաթուղթ է բազմակողմանիությանը նոր շունչ հաղորդելու համար, որի հիմքում պետք է լինի ՄԱԿ-ը:
Հայաստանն ակտիվորեն ներգրավված է եղել «Հանուն ապագայի» դաշնագրի բանակցություններում՝ մշակելու առաջադեմ և բովանդակալից գործողություններ՝ դեպի ավելի լավ, ավելի անվտանգ, ավելի խաղաղ և ներառական աշխարհի ճանապարհ հարթելու համար:
Մենք անհամբեր սպասում ենք Ապագայի գագաթնաժողովի քննարկումներին՝ հիմք ստեղծելու համաշխարհային կառավարման և միջազգային խաղաղության ճարտարապետության բարեփոխման, բնապահպանական արդարության ապահովման, տեխնոլոգիական անջրպետը կամրջելու և Միավորված ազգերի կազմակերպությանը կարող դարձնելու իր մանդատն իրականացնելու համար:
Մաղթում եմ բոլորիս հաջող Ապագայի գագաթնաժողով և անհամբերությամբ սպասում եմ մասնակցելու այդ առանցքային նախաձեռնությանը»:
