Բելառուսը պետք է էլ ավելի ուժեղացնի իր պաշտպանունակությունը և պատրաստվի հնարավոր պատերազմին, հայտարարել է հանրապետության նախագահ Ալեքսանդր Լուկաշենկոն Օբուզ-Լեսնովսկի զորավարժարանում կայացած հանդիպմանը, փոխանցում է ԲելՏԱ-ն։
«Կա հին բանաձև՝ ուզում ես խաղաղություն, պատրաստվիր պատերազմի։ Եվս մեկ անգամ ուզում եմ շեշտել, որ մենք չենք ուզում կռվել, բայց մեր հակառակորդներն իրենց գործն են անում: Ուստի մենք պետք է պատրաստվենք պատերազմի: Տա Աստված, որ այդ պատերազմը տեղի չունենա», – ասել է նա։
Միաժամանակ Լուկաշենկոն նշել է, որ մինչ այժմ Բելառուսի իշխանությունները «երկրի դեմ պատերազմ սանձազերծելու միտումներ» չեն նկատել, թեև իրավիճակը շարունակում է լարված մնալ։
Լուկաշենկոն նաև ասել է, որ Ուկրաինայում և աշխարհի այլ մասերում հակամարտությունների ֆոնին Բելառուսն արդեն չորս անգամ բարեփոխել է բանակը վերջին տարիներին։
