Գլխավոր դատախազ Աննա Վարդապետյանը միջնորդել է Ազգային ժողովին պատգամավորներ Հովիկ Աղազարյանի և Տարոն Մարգարյանի նկատմամբ քրեական հետապնդում հարուցելուն համաձայնություն տալու մասին։ Այդ մասին հայտնում են ՀՀ գլխավոր դատախազությունից:
Հովիկ Աղազարյանին վերաբերող միջնորդության հիմքում ներկայացվել է Հակակոռուպցիոն կոմիտեում քննվող ոչխարների հետ կապված կաշառքի գործը։ Ըստ միջնորդագրի՝ ձեռք են բերվել փաստական տվյալներ պաշտոնատար անձի նկատմամբ ունեցած իրական կամ ենթադրյալ ազդեցությունն օգտագործելու և կաշառք ստանալու հոդվածով Աղազարյանի նկատմամբ հանրային քրեական հետապնդում հարուցելու համար:
Տարոն Մարգարյանի հետապնդումն էլ առնչվում է 2012-2015 թվականներին Երևանում գտնվող երեք կրթական հաստատություններ ձևական աճուրդներով օտարելուն: Գլխավոր դատախազը միջնորդել է Մարգարյանի նկատմամբ քրեական հետապնդում հարուցել փողերի լվացման և պաշտոնեական լիազորությունները չարաշահելու հոդվածով:
