Կենսաթոշակառուներին հետվճարները տրամադրելու գործընթացը երկարաձգվել է

Անկանխիկ առևտրի դիմաց կենսաթոշակառուներին հետվճարները տրամադրելու գործընթացը երկարաձգվել է։ Որոշումն ընդունվել է ՀՀ կառավարության այսօրվա նիստում` ՀՀ աշխատանքի և սոցիալական հարցերի նախարարության առաջարկով, հաղորդում է Sputnik Արմենիան։

Գործող համակարգը, որի ավարտի վերջնաժամկետը 2022թ–ի դեկտեմբերի 31–ն է, երկարացվել է ևս կես տարով` մինչև 2023 թվականի հուլիսի 1-ը:

Պաշտոնական վիճակագրության համաձայն`2022 նոյեմբեր ամսին 59 000 թոշակառուներ 1 մլրդ 950 մլն անկանխիկ գործարք են կատարել, ինչը 4 անգամ գերազանցում է ծրագրի մեկնարկին կատարված գործարքների թիվը։ Որպես կատարված գործարքների հետվճար պետբյուջեից հատկացվել է 195 մլն դրամ, որը յուրաքանչյուր թոշակառուի հաշվարկով կազմում է միջինը 3100 դրամ։

Նշենք, որ կենսաթոշակառուների ծախսերն ուղղվել են առաջին անհրաժեշտության ապրանքների ձեռք բերմանը (դեղորայք, սննդամթերք և այլն) և կոմունալ վճարումներին:

Հիշեցնենք, որ հետվճարի համակարգը հաստատվել է կառավարության 2022 թվականի մայիսի 19-ի որոշմամբ` 2022 թվականի հուլիսի 1-ից մինչև 2022 թվականի դեկտեմբերի 31-ը ժամանակահատվածի համար։