ՀՀ քաղաքացիները կկարողանան Արաբական Միացյալ Էմիրություններ այցելել առանց մուտքի արտոնագրի, հայտնում է Sputnik Արմենիան։
ՀՀ կառավարությունն այսօրվա նիստում հավանություն է տվել ՀՀ–ի ու ԱՄԷ–ի կառավարությունների միջև քաղաքացիների մուտքի արտոնագրի պահանջի վերացման մասին համաձայնագրի կնքման առաջարկությանը։
Նշենք, որ մուտքի ազատականացման գործընթացը մեկնարկել էր 2017 թվականին, հետո ինչ–ինչ պատճառով կանգ էր առել: 2022թ-ի դեկտեմբերին գործընթացը վերսկսվել է «ԱՄԷ-ում ՀՀ քաղաքացիների աշխատանքային գործունեության կանոնակարգման մասին» փոխըմբռնման հուշագրի ստորագրմամբ։ Երկու փաստաթղերի կիրարկումը, ՀՀ կառավարության համոզմամբ, կշահագրգռի ԱՄԷ–ի գործատուներին մեծ թվով ՀՀ քաղաքացիների աշխատանքի ընդունել։
Կառավարությունում նշում են, որ երկու երկրների միջև գրեթե բոլոր բնագավառներում առկա է դինամիկ զարգացող համագործակցություն և ընդգրկուն երկկողմ օրակարգ։ ԱՄԷ-ն տարածաշրջանում ՀՀ առաջին առևտրական գործընկերն է, շարունակական աճ է գրանցում երկկողմ առևտրի և ՀՀ–ում ներդրումների ծավալով։ Նկատելի զարգանում է նաև զբոսաշրջությունը, էականորեն մեծացել է ՀՀ-ԱՄԷ ուղիղ չվերթների թիվը։
