Ամերիկացի առաջնորդը ընդգծել է, որ ԱՄՆ-ն միասնական է Կիևին աջակցելու հարցում և պատրաստ է շարունակել այն այնքան ժամանակ, որքան անհրաժեշտ է։
ԱՄՆ նախագահ Ջո Բայդենը Կոնգրեսին ուղղված իր ամենամյա ուղերձում ասել է, որ Ուկրաինայում պատերազմը դարի փորձություն է Միացյալ Նահանգների և ամբողջ աշխարհի համար։
«Մենք ձեզ հետ կլինենք այնքան ժամանակ, որքան անհրաժեշտ լինի»,- ասել է նա՝ դիմելով Ուկրաինայի դեսպան Մարկարովային, որը, որպես պատվավոր հյուր, ներկա է ուղերձի ներկայացմանը։
Ավելի վաղ Բայդենը հայտարարել էր, որ ուկրաինական հակամարտությունում Վաշինգտոնի նպատակն է, որ Ուկրաինան լինի ժողովրդավարական, անկախ և կարողանա պաշտպանվել նոր հարձակումից։
«Մենք միավորեցինք ՆԱՏՕ-ն և կառուցեցինք համաշխարհային կոալիցիա։ Մենք դեմ դուրս եկանք Պուտինի ագրեսիային: Մենք կանգնեցինք ուկրաինացի ժողովրդի կողքին»,- նշել է ԱՄՆ նախագահը՝ հավելելով, որ ազատ աշխարհը և այլ պետություններ՝ ԱՄՆ-ի գլխավորությամբ, կանգնել են Ուկրաինայի կողքին՝ ցուցաբերելով աննախադեպ ռազմական, հումանիտար և ֆինանսական աջակցություն։
— —
