ԱԹՍ-ների մեծ մասը Ռուսաստան է տեղափոխվել Կասպից ծովով՝ ռուսական ռազմանավով, մյուսները՝ Իրանի պետական ավիաընկերության չվերթով։
Իրանի իշխանությունները Մոսկվային, գաղտնի փոխանցել են թվով 18 հարվածային անօդաչու թռչող սարք, հայտնում է Բրիտանական The Guardian պարբերականը։
Վկայակոչելով Իրանում գտնվող իր աղբյուրները՝ թերթը պնդում է, որ խոսքը իրանական արտադրության հեռահար անօդաչուների, այդ թվում` «Մոհաջեր 6» տեսակի վեց և «Շահեդ 191», «Շահեդ 129» տեսակի 12 դրոնների մասին է։ Վերջիններն, ըստ Guardian-ի, գերմանական արտադրության արդիականացված շարժիչներ ունեն, ինչը թույլ է տալիս դրանց մարտական առաջադրանքը կատարելուց հետո վերադառնալ բազա։
«ԱԹՍ-ների մեծ մասը Ռուսաստան է տեղափոխվել Կասպից ծովով՝ ռուսական ռազմանավով, մյուսները՝ Իրանի պետական ավիաընկերության չվերթով», — գրում է Guardian-ը։
Թերթը նաև պնդում է, որ դրոնների վերջին խմբաքանակը Մոսկվա է առաքվել նախորդ տարվա նոյեմբերի 20-ին։
ԱԹՍ-ների հետ մեկտեղ, ըստ The Guardian-ի, Ռուսաստան են գործուղվել նաև 54 իրանցի մասնագետներ, որոնք պետք է օգնեին ռուսաստանցի զինվորականներին դրոնների շահագործման ընթացքում։
— —
