Պատվիրակության կազմում ընդգրկված էին տարբեր ոլորտներ ներկայացնող տեղի գործարարները:
«Արաս» ազատ տնտեսական գոտու գործադիր տնօրեն, տնօրենների խորհրդի նախագահ, դոկտոր Մաջիդ Քիանիի հրավերով՝ փետրվարի 14-15–ը Կապան համայնքի ղեկավար Գևորգ Փարսյանի գլխավորած պատվիրակությունը երկօրյա աշխատանքային այցով գտնվել է Իրանի Իսլամական Հանրապետության (ԻԻՀ) Թավրիզ քաղաքում և մասնակցել 18 տարվա պատմություն ունեցող «Արաս» ազատ տնտեսական գոտու առաջին Էքսպո ցուցահանդեսի հանդիսավոր արարողությանը: Պատվիրակության կազմում ընդգրկված էին տարբեր ոլորտներ ներկայացնող տեղի գործարարները:
Համայնքի ղեկավարը պատվիրակության անդամների հետ շրջել է մեքենաշինության, շինարարության, գյուղատնտեսության, սննդի արդյունաբերության և մի շարք այլ ոլորտներ ներկայացնող տաղավարներում, ծանոթացել ցուցադրված ապրանքատեսականուն, զրուցել ցուցահանդեսի ղեկավար կազմի ներկայացուցիչների հետ: Տեղի են ունեցել նաև հանդիպումներ, որոնց ընթացքում ձեռք են բերվել մի շարք պայմանավորվածություններ հետագա համագործակցության շուրջ:
Այցի շրջանակներում պատվիրակությունը եղել է նաև պատմամշակութային վայրերում՝ Ջուլֆայի Սուրբ Ստեփանոս վանական համալիրում (9-րդ դար) և Թավրիզի կենտրոնական շուկայում։
—
