Փորձնակի պարագայում քաղաքացին, ուսանողը որևէ կրթական հաստատությունում ուսանելիս կամ մի տարի ավարտելուց հետո ժամանակահատվածում կարող է ինքը որոշել` որ գործատուի մոտ անցի պրակտիկա։
Հայաստանում խնդիր կա կրթությունից դեպի աշխատաշուկա գնալու, այդ պատճառով աշխատանքի և սոցիալական հարցերի նախարարությունը նոր հոդված է առաջարկում ավելացնել, որով նախատեսվում է փորձնակի ինստիտուտի կարգավորումը։ Ազգային ժողովում Աշխատանքային օրենսգրքում փոփոխությունների թեմայով լսումների ժամանակ հայտնեց աշխատանքի և սոցիալական հարցերի փոխնախարար Ռուբեն Սարգսյանը, հայտնում է Sputnik Արմենիան։
«Փորձնակն այն քաղաքացին է, որը երկու ամսվա ընթացքում անցել է որևէ աշխատանքային պրակտիկա որևէ գործատուի մոտ»,–պարզաբանեց փոխնախարարը։
Նա նկատեց, որ ի տարբերություն ՀՀ–ում առկա մեխանիզմների, այն առանձնահատկություններ ունի։ Եթե հիմնականում բուհերն են ուղղորդում ուսանողին որևէ այլ տեղ պրակտիկա անցնելու, փորձնակի պարագայում քաղաքացին, ուսանողը որևէ կրթական հաստատությունում ուսանելիս կամ մի տարի ավարտելուց հետո ժամանակահատվածում կարող է ինքը որոշել` որ գործատուի մոտ անցի պրակտիկա։
Սակայն պրակտիկան ևս սահմանափակումներ ունի։
«Պրակտիկայի տևողությունը մինչև երկու ամիս է, և փորձնակը յուրաքանչյուր գործատուի մոտ մեկ անգամ կարող է այն անցնել։ Հաջորդը` տվյալ գործատուն առնվազն տասը աշխատող պետք է ունենա, որից հետո մեկ հոգի կարողանան ընդգրկել»,–ասաց փոխնախարարը։
Ռուբեն Սարգսյանը նշեց, որ կարգավորվում է պրակտիկայի ժամերը. այն շաբաթական հինգօրյա գրաֆիկում չպետք է լինի 4 ժամից ավել և շաբաթական չպետք է գերազանցի 20 ժամը։
