Հանրությանը ներկայացնել, թե 3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովը իր պաշտոնավարման ընթացքում գնել է զորամասի տարածք, հանձնել 3-րդ անձի, հետո էլ գրավադրել այդ տարածքը բանկում` հայկական բանակի իրական գեներալներից մեկի բարի համբավը պախարակելու միտում ունի։ Այս մասին այսօր լրագրողների հետ հանդիպման ժամանակ հայտարարեց փաստաբան Միհրան Պողոսյան, հայտնում է Sputnik Արմենիան։
«Ես բերել եմ Էդգար Արշակյանի (ըստ մեղադրանքի` հետագայում գույքը վաճառվել է նրան – խմբ.) անվամբ սեփականության վկայականի պատճեն, որտեղ տրված են շենք- շինությունների նկարագրությունները։ Հստակ երևում է, որ այստեղ որևէ զորանոց չկա»,– նշեց նա։
Ըստ փաստաբանի, գլխավոր դատախազը ԱԺ–ում վաճառված տարածքը անվանել է զորամաս գործին հնչեղություն տալու համար, քանի որ հանրությունը այլ կերպ է ընկալում երբ ասում են զորամաս է վաճառվել և բոլորովին այլ կերպ է ընդունում, երբ ասում են ՊՆ–ին ամրակցված տարածք է վաճառվել։
«Սա եղել է ՊՆ–ին ամրակցված տարածք, որը ՊՆ –ն որոշել է վաճառել։ Ավելին` դա անթույլատրելի արարք կամ գործարք չէ։ Վերջին 5 տարում վաճառվել է ՊՆ –ի ամրակացված տարածքներից 71 միավոր, ու ոչ մեկի մասին խոսք անգամ չի ասվել»,– հավելեց փաստաբանը։
Փաստաբանը պնդում է, որ ներկա իշխանությունը գենետիկ անհանդուրժողականություն ունի իր կարծիքին չհամաձայնող, որոշումներին ընդդիմացող անձանց նկատմամբ, հենց այդ է այս գործի հարուցման պատճառը։ «Ասում են, թե բացառված է, որ Հայաստանում գործ «կարեն» ինչ որ մեկի վրա, բայց փաստ է, որ Էդգար Արշակյանին պատկանող հողամասը տարել, գցել են Գրիգորի Խաչատուրովի գրպանը։ Գործ «կարելը» պոզով-պոչով չի լինում», – հայտարարեց Միհրան Պողոսյանը։
Նրա կարծիքով, Գրիգորի Խաչատուրովի վերաբերյալ այս պայմաններում նորմալ իրավական երկրում չէր կարող իրականացվել քրեական հետապնդում։
