Երիտասարդը առանձնապես խոշոր չափերով՝ առնվազն 162 գրամ, «MDMB-2201 (5F-MDMB-PICA)» տեսակի թմրամիջոց է իրացրել բազմաթիվ անձանց՝ դրա դիմաց ստանալով 53․ 479․ 443 մլն դրամ։
Երևանաբնակ ամուսիններին մեղադրանք է առաջադրվել թմրամիջոցների ապօրինի շրջանառման և հանցավոր ճանապարհով առանձնապես խոշոր չափերով գույք օրինականացնելու համար։ Տեղեկությունը հայտնում է ՀՀ քննչական կոմիտեն։
Պարզվել է, որ Երևան քաղաքի 26-ամյա բնակիչը 2019թ. նոյեմբերից «Telegram» հեռահաղորդակցման հավելվածում ստեղծել և կառավարել է «Shoko.178», «Shoko 178» և գրեթե նույնանուն այլ առցանց խանութ-հարթակներ, որոնց միջոցով թմրամիջոցներ է վաճառել։
Որպես գումարի ստացման վճարային գործիք, նա տեղադրել է այլ անձանց անուններով գրանցված, սակայն իր կողմից կառավարվող էլեկտրոնային դրամապանակների վերաբերյալ տեղեկություն։
Երբ գնորդները փոխանցել են երիտասարդի հաշվին գումարի մուտքագրման փաստը հաստատող անդորրագրի լուսանկարները, նրանց ուղարկվել են Երևանում գտնվող թաքստոցներում նախապես տեղադրված, ըստ քաշերի առանձնացված և փաթեթավորված թմրամիջոցների տեղակայման լուսանկարները՝ ճշգրիտ աշխարհագրական կոորդինատներով:
Երիտասարդը նշված եղանակով առանձնապես խոշոր չափերով՝ առնվազն 162 գրամ, «MDMB-2201 (5F-MDMB-PICA)» տեսակի թմրամիջոց է իրացրել բազմաթիվ անձանց:
Ձեռք բերված տվյալների համաձայն՝ թմրամիջոցների իրացումից ստացված ընդհանուր 53.479.443 դրամի հանցավոր ծագումը, դրանց իրական բնույթը թաքցնելու, տեղաշարժն ու տեղաբաշխումը քողարկելու, դրանց օրինական տեսք հաղորդելու նպատակով 26-ամյա երիտասարդն իր 24-ամյա կնոջ օժանդակությամբ նշված գումարները փոխանցել է տարբեր անձանց անուններով գրանցված, սակայն իր և կնոջ կողմից փաստացի կառավարվող ինչպես օտարերկրյա, այնպես էլ ՀՀ-ում գրանցված տարատեսակ էլեկտրոնային դրամապանակներին։
Ապա նույն եղանակով դրանք փոխանցվել են ամուսինների էլեկտրոնային դրամապանակներին, կանխիկացվել կամ այլ կերպ տնօրինվել նրանց կողմից:
Ձեռք բերված բավարար փաստերի համակցությամբ երիտասարդին մեղադրանք է ներկայացվել իրացնելու նպատակով առանձնապես խոշոր չափերով թմրամիջոցների ապօրինի շրջանառության, առանձնապես խոշոր չափերով փողերի լվացման համար: Նրա նկատմամբ որպես խափանման միջոց է կիրառվել կալանավորումը:
Վերջինիս կնոջը մեղադրանք է ներկայացվել առանձնապես խոշոր չափերով փողերի լվացմանն օժանդակելու համար:
Նախաքննությունն ավարտվել է, և քրեական վարույթի նյութերը մեղադրական եզրակացությամբ ուղարկվել են հսկող դատախազին՝ այն հաստատելու և դատարան ուղարկելու համար:
