Թուրքիայի 81 նահանգներում կիրակի օրը բացվել են նախագահական և խորհրդարանական ընտրությունների ընտրատեղամասերը։ Նրանք կաշխատեն տեղական ժամանակով մինչև ժամը 17:00-ն: Ընտրելու իրավունք ունի Թուրքիայի 64 միլիոն քաղաքացի։
ՏԱՍՍ-ը գրում է, որ Անկարայում և Ստամբուլում, Թուրքիայի խոշոր քաղաքներում զգալիորեն ուժեղացվել են անվտանգության միջոցները, որպեսզի ընտրողները կարողանան ապահով կերպով օգտվել իրենց ընտրական իրավունքից։
Թուրքիայի նախագահական ընտրություններին մասնակցում է երեք թեկնածու՝ գործող նախագահ Ռեջեփ Թայիփ Էրդողանը, ընդդիմադիր թեկնածու Քեմալ Քըլըչդարօղլուն և ATA դաշինքի թեկնածու Սինան Օգանը։ Սպասվում է, որ պետական ամենաբարձր պաշտոնի համար հիմնական պայքարը ծավալվելու է Էրդողանի և Քըլըչդարօղլուի միջև։ Հաղթելու համար պետք է հավաքել 50%-ից ավելի ձայն, տեղի քաղաքագետները չեն բացառում Թուրքիայում նախագահական ընտրությունները երկփուլանի լինեն։ Այդ դեպքում երկրորդ փուլը կկայանա մայիսի 28-ին։ Ձայների պարզ մեծամասնություն ստացած թեկնածուն հաղթող կճանաչվի։
Նախագահական ընտրություններին զուգահեռ կան նաև խորհրդարանական ընտրություններ։ Դրանցում ներգրավված են 36 կուսակցություններ, որոնցից մի քանիսը դաշինքներ են կազմել՝ խորհրդարանում ավելի շատ տեղեր ստանալու հնարավորությունները մեծացնելու համար:
Ընտրություններում լարվածությունն այնքան բարձր է ոչ միայն այն պատճառով, որ կոշտ պայքար է ընթանում Էրդողանի 20-ամյա ղեկավարության և իր ուժը զգացած ընդդիմության միջև։ Հոկտեմբերի 29-ին Թուրքիայի Հանրապետությունը կդառնա 100 տարեկան։ Սա շատ կարևոր ամսաթիվ է ներկայիս կառավարության համար, որն իր բազմաթիվ նախագծերն ու ծրագրերը նախատեսել է հենց այս իրադարձության համար։
