ՌԴ ԱԳՆ ղեկավարն ընդգծել է, որ փաստաթուղթը լիովին համաձայնեցվել էր արտգործնախարարների մակարդակով, սակայն վերջին պահին հայ գործընկերները խնդրեցին հետաձգել դրա ընդունումը։
Երևանն, ստորագրելով ՀԱՊԿ դիտորդական առաքելության տեղակայման մասին փաստաթուղթը, ավելի կայուն իրավիճակ կունենար։ Այս մասին հայտարարել է ՌԴ ԱԳ նախարար Սերգեյ Լավրովը «Ցարգրադ» հեռուստաալիքին տված հարցազրույցում։
«2022թ․ աշնանը Երևանում կայանալիք ՀԱՊԿ գագաթաժողովի համար փաստաթուղթ էր պատրաստվել Հայաստանի տարածքում Հավաքական անվտանգության պայմանագրի կազմակերպության դիտորդական առաքելություն տեղակայելու մասին՝ մեր հայ դաշնակիցների խնդրանքին համապատասխան»,- նշել է Լավրովը հավելելով, որ եթե Երևանը հաստատեր արդեն համաձայնեցվածը և պատրաստ լիներ ստորագրմանն ու դրա՝ ուժի մեջ մտնելուն, Հայաստանը կշահեր և ավելի կայուն իրավիճակ կստանար։
ՌԴ ԱԳՆ ղեկավարն ընդգծել է, որ փաստաթուղթը լիովին համաձայնեցվել է արտգործնախարարների մակարդակով․ «Այնուհետ, վերջին պահին, հենց գագաթաժողովում հայ ընկերները խնդրեցին հետաձգել դրա ընդունումը, և մինչ այժմ այն մնում է թղթային և չի կարող իրականացվել»։
