Բաքուն երրորդ երկիր տանող հեշտացված ճանապարհ է ուզում

Սիմոնյանի խոսքով Ադրբեջանը ցանկանում է իրավիճակից հնարավորինս շատ բան ստանալ։

Բաքուն դեպի Նախիջևան երթուղին չի ընկալում որպես երրորդ երկիր տանող երթուղի` պնդելով, որ հեշտացված տարբերակ է պետք, այդ պատճառով Հայաստանի համար էլ պետք է նման ռեժիմ գործի Նախիջևանով Սյունիք շարժվելու համար։ Այս մասին լրագրողների հետ ճեպազրույցում ասաց ՀՀ ազգային ժողովի նախագահ Ալեն Սիմոնյանը, հայտնում է Sputnik Արմենիան։

«Ընդհանուր ընկալում կա, հիմնականում տեխնիկական են խնդիրները։ Օրինակ` թե ինչ–որ բեռ այստեղից այնտեղ ինչպես պետք է անցնի, հարցը դրանում է։ Իմ ընկալմամբ` խնդիրը հետևյալն է. խոսքը մի պետության մեջ տեղաշարժման մասին է, և Ադրբեջանի դիրքորոշման մեջ հիմնական կարմիր գիծն այն է, որ ինքն իր երկրից երրորդ երկիր չի տեղափոխվում, ասենք, Բաքվից Նախիջևան գնալիս։ Իր պատկերացմամբ դա ենթադրում է, որ մենք ինչ–որ այլ, հեշտացված տարբերակ պետք է հասկանանք»,– նշեց Սիմոնյանը։

Նա վստահեցրեց` Հայաստանը կողմ է, որպեսզի բոլոր ճանապարհներն ապաշրջափակվեն, իսկ Ադրբեջանը ցանկանում է իրավիճակից հնարավորինս շատ բան ստանալ։

Թե ինչ պահանջներ է ներկայացնում ադբեջանական կողմը, Սիմոնյանը շեշտեց` որպես այդպիսին խնդիր չկա, կա բանակցային պրոցես և կան կարծիքներ, որոնցից փորձ է արվում ընդհանուր համագումար ստանալ։ Հայկական տարածքում վերահսկողության առումով էլ շեշտեց` Հայաստանը կորոշի, թե ով է դա իրականացնելու։

Նա շեշտեց` սահմանների ապաշրջափակումը փոխադարձ գործընթաց է և, եթե ադրբեջանցին պետք է գա Հայաստանի տարածքով գնա Նախիջևան, դա նշանակում է, որ Հայաստանի բնակիչն էլ կարող է Ադրբեջանի տարածքով գնալ Ռուսաստան կամ որևէ այլ երկիր։

Հիշեցնենք` հունիսի 2-ին Մոսկվայում անցկացվեց Հայաստանի փոխվարչապետ Մհեր Գրիգորյանի, Ռուսաստանի փոխվարչապետ Ալեքսեյ Օվերչուկի և Ադրբեջանի փոխվարչապետ Շահին Մուստաֆաևի համանախագահությամբ եռակողմ աշխատանքային խմբի 12-րդ նիստը:

Հանդիպումից հետո ՀՀ կառավարությունը հայտարարեց, որ էական առաջընթաց է արձանագրվել Հայաստանի Հանրապետության և Ադրբեջանի Հանրապետության միջև տրանսպորտային հաղորդակցությունների ապաշրջափակման կազմակերպման եղանակների համաձայնեցման հարցում:

Ավելի ուշ Ադրբեջանի փոխվարչապետ Շահին Մուստաֆաևն ասել էր` նախատեսվում է վերականգնել առկա տրանսպորտային հաղորդակցություններն ու կառուցել նորերը, որոնք Նախիջևանը կկապեն Ադրբեջանի արևմտյան շրջանների հետ` հավելելով, որ հաղորդակցության ուղիները Հայաստանի տարածքում հսկելու են Ռուսաստանի անվտանգության դաշնային ծառայության սահմանապահները։

ՀՀ փոխվարչապետ Մհեր Գրիգորյանի գրասենյակը հերքեց այդ հայտարարությունը` նշելով, որ 2020թ. նոյեմբերի 9-ի եռակողմ հայտարարության 9-րդ կետով նախատեսված ճանապարհները պիտի գործեն կողմերի ինքնիշխանության և իրավազորության ներքո։