Իրանը դարձավ ՇՀԿ 9-րդ անդամը։
Իրանը դարձել է Շանհայի համագործակցության կազմակերպության լիիրավ անդամ (ՇՀԿ): Այս մասին հաղորդվում է կազմակերպության Նյու Դելիի հռչակագրում, փոխանցում է РИА Новости-ն ։
«Անդամ երկրներն ընդգծել են Իրանի Իսլամական Հանրապետության՝ ՇՀԿ-ին որպես լիիրավ անդամ երկիր ընդունելու պատմական նշանակությունը»,- ասվում է փաստաթղթում։ Իրանի արտգործնախարարության խոսնակ Նասեր Քանաանին ավելի վաղ նշել էր, որ Թեհրանի մուտքը կազմակերպություն կբավարարի անդամ բոլոր երկրների շահերը։
Նշենք, որ Շանհայի համագործակցության կազմակերպությունը հիմնադրվել է 2001 թվականին և ներառում է Ռուսաստանը, Հնդկաստանը, Չինաստանը, Ղազախստանը, Իրանը, Ղրղզստանը, Տաջիկստանը, Պակիստանը և Ուզբեկստանը։ Բելառուսը դիտորդի կարգավիճակ ունի, սակայն անցած հուլիսին Մինսկը հայտ է ներկայացրել լիիրավ անդամակցության համար։
Կազմակերպության հիմնական խնդիրներն են անդամ երկրների տարածքներում կայունության և անվտանգության ամրապնդումը, ահաբեկչության, անջատողականության, ծայրահեղականության, թմրամիջոցների ապօրինի շրջանառության դեմ պայքարը, տնտեսական համագործակցության զարգացումը և այլն։
