ֆորումի հիմնական ուղերձն է ցույց տալ այսօրվա միտումները զբոսաշրջության ոլորտում, թե ինչպես են մտածում ներդրողները և հիմնականում որտեղ են ներդրումներ կատարում։
Սեպտեմբերի 6-8-ը Երևանում առաջին անգամ կանցկացվի Զբոսաշրջության համաշխարհային ներդրումային ֆորում։ Տեղեկությունն ասուլիսում հայտնեց ՀՀ էկոնոմիկայի նախարարության զբոսաշրջության կոմիտեի նախագահ Սիսիան Պօղոսեանը։
«Փորձել ենք բավականին հետաքրքիր օրակարգ ունենալ։ Խոսնակներ են մասնակցելու ԱՄՆ–ից, Դուբայից, Եվրոպայից…Խոսվելու է ներդրումային ոլորտից, կենտրոնանալու ենք Հայաստանի ներդրումային պոտենցիալի վրա»,–ասաց նա։
Ֆորումին կմասնակցեն ՄԱԿ-ի անդամ երկրների զբոսաշրջության ոլորտի ներկայացուցիչներ, օտարերկրյա և տեղական ներդրողներ և բանախոսներ, լրատվամիջոցների, պետական և մասնավոր կառույցների ներկայացուցիչներ։
Զբոսաշրջության կոմիտեի միջազգային համագործակցության վարչության պետ Սոնա Հովհաննիսյանն էլ իր հերթին նշեց, որ ֆորումի հիմնական ուղերձն է ցույց տալ այսօրվա միտումները զբոսաշրջության ոլորտում, թե ինչպես են մտածում ներդրողները և հիմնականում որտեղ են ներդրումներ կատարում։
Սոնա Հովհաննիսյանը տեղեկացրեց, որ ֆորումին ընդհանուր առմամբ կմասնակցեն 150 ներկայացուցիչներ։ Ֆորումի մասնակիցների համար տուրեր կկազմակերպվեն, որպեսզի նրանք էլ ավելի լավ ճանաչեն Հայաստանը։
«Առաջին օրը լինելու է Երևան սիթի տուր։ Նաև ունենք երեք տարբեր ուղղություններով կազմակերպված տուրեր։ Փորձելու ենք ֆորումի մասնակիցներին ներկայացնել մեր մշակույթը, սնունդը և գինին»,–ասաց նա։
Հայաստանում ներդրումային ֆորումի կազմակերպումը կնպաստի միջազգային փորձագետների կողմից ներդրումային ոլորտում իրենց փորձի ներկայացմանը, ոլորտի մարտահրավերների և ռիսկերի քննարկմանը:
