Գրադարանի դիզայն նախագիծը, ճարտարագիտական լուծումները և ծրագրային ապահովումը մշակվել է մասնաճյուղում։
ՀԱՊՀ ռեկտոր Գոռ Վարդանյանի մասնակցությամբ Պոլիտեխնիկի Գյումրու մասնաճյուղում բացվել է նորաոճ էլեկտրոնային գրադարան և Ադդիտիվ տեխնոլոգիաների լաբորատորիա: Բացման հանդիսավոր միջոցառմանը մասնակցել է
Շիրակի մարզպետ Մուշեղ Մուրադյանը:
Գրադարանի դիզայն նախագիծը, ճարտարագիտական լուծումները և ծրագրային ապահովումը մշակվել է մասնաճյուղում։ Այցելուները գրադարանից կօգտվեն պլաստիկ էլեկտրոնային քարտերով, որը հնարավորություն է ընձեռում պատվիրած գրքի վերաբերյալ SMS հաղորդագրության միջոցով տեղեկանալ գրքի ստացման և վերադարձման ժամկետի մասին։
Էլեկտրոնային գրքերի պատվիրման դեպքում այցելուն ստանում է QR կոդ, որի միջոցով գիրքը ավտոմատ ներբեռնվում է վերջինիս հեռախոսի կամ այլ թվային սարքի մեջ։ Համակարգը կատարում է ծրագրային վերլուծություններ գրադարանի աշխատանքի վերաբերյալ։ Գրադարանի ընթերցասրահը հարմարեցված է նաև քննարկումների, բանավեճերի անցկացման համար։
Նորաբաց Ադդիտիվ տեխնոլոգիաների լաբորատորիան համալրված է պրոֆեսիոնալ աշխատանքի համար նախատեսված երկու տպող գլխիկներով եռաչափ տպիչով ու սկաներով և այլ գործիքներով, որը հնարավորություն է տալիս իրականացնել ցանկացած բարդության դետալի եռաչափ մոդելավորում՝ ծրագրային միջավայրում, ինչպես նաև անմիջական նախատիպի սկանավորման միջոցով։
Տպիչը ապահովում է տարբեր հատկություններով, այդ թվում նաև ջրալույծ պլաստմասաների համադրությամբ պատրաստված դետալների ստացում մինչև 0,05 մմ ճշտությամբ։
Նման ծրագրերը մարզային կառույցներում լինելու են շարնակական: Այն ճանապարհ է ապահովելու մրցունակ տեխնոլոգիական կրթություն:
