🎦Հզոր բռնկում՝ Արեգակի վրա

Տիեզերական փոթորիկն ազդել է Ավստրալիայի և Հարավարևելյան Ասիայի երկրների վրա:

Արեգակի վրա փետրվարի 6-ն հզոր՝ M դասի բռնկում է տեղի ունեցել՝ արևային զանգվածի արտանետմամբ, որը Խաղաղ օվկիանոսի հարավային հատվածներում կարճ ռադիոալիքների համատարած խափանում է առաջացրել։ Տիեզերական փոթորիկն ազդել է Ավստրալիայի և Հարավարևելյան Ասիայի երկրների վրա։ Այս մասին հայտնում է spaceweather.com կայքը։

Տարածաշրջանի նավաստիները և ռադիոսիրողները նկատել են, որ 30 ՄՀց-ից ցածր հաճախականություններում ազդանշանը կորել է և բռնկման ամենաթեժ պահից հետո մինչև մեկ ժամ այն չի վերականգնվել։

Ռադիոյի խափանումը վերագրվում էր ռենտգենյան ճառագայթների և ուլտրամանուշակագույն ճառագայթների ուժեղ իմպուլսին, որը Երկիր է հասել արևի վրա տեղի ունեցած բռնկումից ութ րոպե անց: Այս ճառագայթումը իոնացրել է Երկրի մթնոլորտի վերին շերտը՝ արևի լուսավորած հատվածը։

Բացի այդ, Արեգակն արտանետել է արևային պլազմայի հսկայական զանգված, որն ընթանում է ժամում ավելի քան 400 կիլոմետր արագությամբ: Եթե ​​այն հասնի Երկիր, ապա կարող է առաջացնել մագնիսական դաշտի խանգարումներ և խաթարել արբանյակների աշխատանքը, ինչպես նաև բևեռափայլեր առաջացնել բարձր լայնություններում։

Սակայն աստղագետների տվյալներով՝ այս արտանետումը չի սպառնում մեր մոլորակին, քանի որ այն տեղի է ունեցել Արեգակի հարավային բևեռին ավելի մոտ տարածքում, ուստի պլազմային ամպը գրեթե անկասկած կշրջանցի Երկիրը։