6 մլրդ 874 մլն դրամ կհատկացվի 57,2 կմ ճանապարհների շինաշխատանքների համար։
Կառավարության մարտի 14-ի նիստին հաստատվեց որոշման նախագիծ, որով ֆինանսական միջոցներ կհատկացվեն մի շարք ճանապարհահատվածների շինարարության շարունակման, ավարտման կամ նոր հատվածների կառուցում սկսելու համար, ինչպես նաև մի շարք պայմանագրերի վերջնական՝ 5 տոկոսը վճարելու համար: Այդ մասին որոշումը ներկայացրեց ՏԿԵ նախարար Գնել Սանոսյանը:
«Նախագծով 6 միլիարդ 874 միլիոն դրամ է նախատեսված, և ճանապարհների երկարությունն է 57,2 կմ այս նախագծի շրջանակներում»,- ասաց նախարարը:
Վարչապետ Նիկոլ Փաշինյանը թվարկեց այն ճանապարհները, որտեղ որոշմամբ նախատեսվում է աշխատանքներ իրականացնել: Ըստ այդմ՝ նախատեսվում է Սյունիքի մարզում Շինուհայր-Հալիձոր-Սատանի կամուրջ ճանապարհի հիմնանորոգում: Կվերանորոգվի նաև Ենոքավան-Կարմիր գյուղ՝ 6,3 կիլոմետրանոց ճանապարհը, որը Իջևանի խաչմերուկից՝ գլխավոր մայրուղուց, բարձրանալու է մինչև Ենոքավան, իսկ մինչև տուրիստական կլաստեր տանող գրունտային ճանապարհը կվերանորոգվի այլ ծրագրով:
