Հայաստանի և Ադրբեջանի միջև կայուն խաղաղություն հաստատելու համար անհրաժեշտ բոլոր տարրերը կան՝ հայտարարել է Հարավային Կովկասում ԵՄ հատուկ ներկայացուցիչ Տոյվո Կլաարի խոսնակ Անրի Դուկենը։
«Մենք մշտական կապի մեջ ենք կողմերի հետ և կարծում ենք, որ մի քանի տարվա բանակցություններից և քննարկումներից հետո, այդ թվում՝ Շառլ Միշելի աջակցությամբ, կայունության հասնելու պայմաններ են ստեղծվել», – համոզմունք է հայտնել Դուկենը:
Նրա խոսքով՝ ԵՄ-ն ողջունում է այն փաստը, որ Երևանը և Բաքուն պարբերաբար փոխանակում են խաղաղության պայմանագրի տեքստի վերաբերյալ առաջարկները։
Հարավային Կովկասում ԵՄ հատուկ ներկայացուցչի խոսնակը նաև տեղեկացրել է, որ Տոյվո Կլաարը կշարունակի տարածաշրջանային այցերը՝ խթանելու խաղաղության օրակարգը։
