Վթարից տուժած զինծառայողների առողջական վիճակում դրական դինամիկա կա

Սյունիքի մարզում «Ուրալ» մակնիշի մեքենայով զինծառայողների ձորն ընկնելուց հետո ծայրահեղ ծանր վիճակում գտնվող զինծառայողի վիճակում դրական դինամիկա կա։ Այս մասին Sputnik Արմենիային հայտնեցՀՀ պաշտպանության նախարարի մամուլի խոսնակ Արամ Թորոսյանը։

«Ապրիլի 12-ի վթարի հետևանքով ծայրահեղ ծանր վիճակում գտնվող զինծառայողի առողջական վիճակում կա դրական դինամիկա, այս պահին նրա վիճակն արդեն գնահատվում է ծանր կայուն։ Տարբեր աստիճանի վնասվածքներ ստացած մյուս զինծառայողների առողջական վիճակում էլ դրական դինամիկա կա, նրանց անհրաժեշտ բժշկական օգնություն է ցուցաբերվում»,– նշեց Թորոսյանը։

Հիշեցնենք` զինծառայողներին տեղափոխող «Ուրալ» մակնիշի ավտոմեքենան ապրիլի 12-ին՝ ժամը 15:25-ի սահմաններում, դուրս է եկել ճանապարհի երթևեկելի հատվածից և ընկել ձորակը, ինչի հետևանքով 4 զինծառայող է մահացել, 20–ը վնասվածքներ են ստացել։

Վթարի փաստով քրեական վարույթ է նախաձեռնվել ՀՀ քրեական օրենսգրքի 538-րդ հոդվածի 4-րդ մասի հատկանիշներով։