Թեհրանը տեղորոշել է Իսրայելի «միջուկային կենտրոնների» գտնվելու վայրը և պատրաստ է ոչնչացնել դրանք, եթե հրեական պետությունն արձագանքի իսրայելական ռազմական օբյեկտների վրա իրանական վերջին հարձակմանը։ Այս մասին հայտարարել է Իսլամական հեղափոխության պահապանների կորպուսի միջուկային պաշտպանության և անվտանգության ստորաբաժանման հրամանատար, գեներալ Ահմադ Հաքթալաբը, հայտնում է ՏԱՍՍ-ը։
«Սիոսնիստական թշնամու միջուկային օբյեկտները տեղորոշված են, մեր տիրապետության տակ ունենք բոլոր թիրախների մասին անհրաժեշտ ամբողջ տեղեկությունը և նրանց ենթադրյալ պատասխան գործողություններին պատրաստ ենք արձակել հզոր հրթիռներ, որպեսզի ոչնչացնենք թիրախները»,- նրա խոսքերն է մեջբերում ISNA -ն։
Ըստ Հաքթալաբի՝ Իսրայելը երկար տարիներ «դիվերսիոն և ահաբեկչական գործողություններ» է իրականացնում Իսլամական Հանրապետության միջուկային ենթակառուցվածքի դեմ։ Հրամանատարը նշել է՝ եթե Իսրայելը «Իրանի դեմ ագրեսիա գործի», իրանական բանակը զինված ուժերի առկա ներուժի շնորհիվ, այդ թվում՝ հակաօդային պաշտպանության, «կպատասխանի Իսրայելի ցանկացած սպառնալիքի»։
