Պարտապանի եկամուտները բռնագանձել նվազագույն աշխատավարձի չափով․ նախագիծ

Նախատեսվող փոփոխությունները վերաբերում են 200 հազար դրամից ավելի գումարի պահանջով վարույթներով կալանքի դեպքերին։

ՀՀ–ում պարտապանների եկամուտները կարող են բռնագանձվել միայն մինչև նվազագույն աշխատավարձի չափին համապատասխան գումարով։ ՀՀ արդարադատության նախարարությունն առաջարկում է նման փոփոխություններ կատարել «Դատական ակտերի հարկադիր կատարման մասին» ՀՀ օրենքում։ Այս նախագիծն այսօր քննարկվեց ՀՀ ԱԺ պետաիրավական հարցերի մշտական հանձնաժողովի նիստի ժամանակ, հայտնում է Sputnik Արմենիան։

ՀՀ արդարադատության փոխնախարար Լևոն Բալյանը նշեց, որ նախատեսվող փոփոխությունները վերաբերում են 200 հազար դրամից ավելի գումարի պահանջով վարույթներով կալանքի դեպքերին։

«Օրինակ` եթե քաղաքացին բռնագանձման միջոցներ չունի, ապա նրա աշխատավարձի նվազագույն շեմը բավարար կլինի 6 ամսվա ընթացքում պահանջվող գումարը վճարելու համար»,– ասաց Բալյանը:

Բացի այդ, մասնակի արգելանք դնելուց հետո պարտապանի եկամուտների ընդհանուր ծավալը չպետք է պակաս լինի նվազագույն աշխատավարձի չափից: Բանն այն է, որ այժմ պարտապանի աշխատավարձից կարող են պահել գումարի մինչև 50 տոկոսը, և նա կարող է զրկվել ապրուստի միջոցներից։