«Բնակչության բժշկական օգնության և սպասարկման մասին» օրենքում լրացումներ կատարելու մասին նախագծի ընդունման անհրաժեշտությունը պայմանավորված է բուժաշխատողների մասնագիտական գիտելիքների, հմտությունների շարունակական զարգացման համատեքստում արդիական ու կարևոր համարվող որոշ դասընթացների պարտադիր մասնակցելու պահանջով: Այդ մասին Կառավարության՝ մայիսի 8-ի նիստին ասաց ՀՀ առողջապահության նախարար Անահիտ Ավանեսյանը՝ ներկայացնելով բուժաշխատողների դասընթացների մասով որոշման նոր նախագիծը:
«Ներկայումս բուժաշխատողներն իրենք են ընտրում այն շարունակական մասնագիտական զարգացման դասընթացները, իսկ նախագծով առաջարկվում է սահմանել որոշակի դասընթացների ցանկը, որոնց մասնակցելը պարտադիր կլինի՝ անկախ մասնագիտական ուղղվածությունից: Որպես այդպիսին՝ կարող են լինել, օրինակ, արտակարգ իրավիճակներում կամ աղետների ժամանակ տուժածներին ցուցաբերվող անհետաձգելի բուժօգնության վերաբերյալ դասընթացները, էթիկական նորմերի իմացությունը և այլն»,- ասաց նախարարը:
Որոշման նախագծով առաջարկվում է նաև միջազգային և օտարերկրյա կազմակերպությունների կողմից առաջարկվող, շարունակական զարգացում ապահովող միջոցառումներին մասնակցության համար սահմանել փոխհատուցման կարգ ու փոխհատուցման դեպքեր:
«Սա կարևոր խթան կլինի արտերկրում կազմակերպվող դասընթացներին առցանց մասնակցելու համար՝ հաշվի առնելով այն հանգամանքը, որ դրանց վճարը Կառավարությունը կսուբսիդավորի սահմանված կարգով»,- նշեց Ավանեսյանը:
