Բելառուսական կողմն առաջարկել է պարզ առևտրից, արտահանում-ներմուծումից անցում կատարել ավելի լուրջ նախագծերի։
Եվրասիական միջկառավարական խորհրդի նիստին ընդառաջ ՀՀ վարչապետ Նիկոլ Փաշինյանը հանդիպել է Բելառուսի վարչապետ Ռոման Գոլովչենկոի հետ։
Հանդիպման ընթացքում կողմերը մտքեր են փոխանակել հայ-բելառուսական հարաբերությունների զարգացման հեռանկարների շուրջ։ SputnikԱրմենիայի փոխանցմամբ քննարկելով առևտրատնտեսական կապերի ընդլայնման և համատեղ ծրագրերի իրականացման հնարավորությունները՝ Բելառուսի վարչապետը նշել է, որ շահագրգռված են Հայաստանի տարածքում վերելակների արտադրություն սկսելու հարցում։
«Այժմ կարևոր է պարզ առևտրից, արտահանում-ներմուծումից անցում կատարել ավելի լուրջ նախագծերի։ Մենք քննարկում ենք մեքենաշինության ոլորտում համագործակցության, համատեղ արտադրությունների ստեղծման հարցերը։ Բելառուսական արտադրող «Մոգիլևլիֆտմաշը» հանդես է եկել Հայաստանի տարածքում վերելակների արտադրություն սկսելու նախաձեռնությամբ»,-ասել է Գոլովչենկոն։
Հավելենք, որ Բելառուսի վարչապետն այսօր ժամանել է Երևան՝ մասնակցելու Եվրասիական միջկառավարական խորհրդի նիստին, որն անցկացվելու է հոկտեմբերի 20–ին և 21–ին։
