Հոկտեմբերի 20-ին Կապան համայնքի ղեկավարի տեղակալ Գոռ Թադևոսյանն ընդունել է Կապանում Իրանի նորանշանակ գլխավոր հյուպատոս Մորթեզա Աբեդին Վարամինին:
Կապանի համայնքապետարանի մամուլի ծառայությունից տեղեկացնում են, որ հանդիպմանը կողմերը քննարկել են Կապանում Իրանի հյուպատոսության վաղվա կայանալիք պաշտոնական բացմանն առնչվող նախապատրաստական և կազմակերպչական հարցերը։
Խոսելով առևտրատնտեսական, կրթական, մշակութային, առողջապահության ոլորտում հնարավոր համագործակցության ուղիների մասին՝ համայնքի ղեկավարի տեղակալն ընդգծել է, որ Կապանի մանկապատանեկան ստեղծագործության կենտրոնում արդեն իսկ սկսվել է պարսկերենի դասավանդումը։
Համայնքապետարանի տարածած հաղորդագրության մեջ նշվում է, որ հանդիպմանը անդրադարձ է եղել նաև Կապանի և իրանական որևէ քաղաքի միջև քույր քաղաքների հարաբերություններ հաստատելու հնարավորությանը։
