Շառլ Ազնավուրի հարյուրամյակի առթիվ մայիսի 16-ին Փարիզի 9-րդ թաղամասի քաղաքապետարանի նախաձեռնությամբ տեղի է ունեցել մեծ արտիստի և հումանիստի հիշատակին նվիրված հուշատախտակի բացման արարողությունը։ Արարողությունը տեղի է ունեցել Փարիզի 9-րդ շրջանի քաղաքապետ տիկին Դելֆին Բյուրքլիի և Ֆրանսիայում Հայաստանի Հանրապետության դեսպան տիկին Հասմիկ Տոլմաջյանի ներկայությամբ։ Այս մասին տեղեկացնում է «Ազնավուր» հիմնադրամը:
Ազնավուրյանների ընտանիքը Երկրորդ համաշխարհային պատերազմի տարիներին ապրել է Նավարեն 22 փողոցում և իրենց բնակարանում պատսպարել Մելինե և Միսաք Մանուշյաններին, ինչպես նաև Դիմադրության այլ մարտիկների:
Շառլ Ազնավուրն անչափ լավ գիտեր թաղամասի յուրաքանչյուր փողոց, յուրաքանչյուր անկյուն իր համար թանկ էր այստեղ: Իր ողջ կյանքի ընթացքում նա խորապես կապված էր 9-րդ թաղամասի հետ՝ Նավարեն փողոցում ապրելու տարիներից մինչև «Օլիմպիա» համերգասրահում փառահեղ ելույթների և Ռոսինի փողոցում գտնվող իր գրասենյակների ժամանակներ։ Սա մի վայր է, որտեղ Ազնավուրն իրեն տանն էր զգում։
