Հայաստանում ԵՄ-ի և ԵԱՀԿ-ի առաքելություններն ունեն տարբեր մանդատներ և չեն կրկնելու միմյանց աշխատանքը։
Եվրոպական Միությունը մանրամասներ է ներկայացրել Հայաստանի և Ադրբեջանի սահմանին դիտորդական առաքելության տեղակայման վերաբերյալ:
«Արմենպրես»-ի փոխանցմամբ ԵՄ-ն հստակեցրել է առաքելության գործունեությանն առնչվող որոշ հարցեր։ Մասնավորապես՝
- Առաքելությունը մանդատ ունի հետևել իրավիճակին Հայաստանի և Ադրբեջանի սահմանամերձ շրջաններում կողմերի միջև վստահությունն ամրապնդելու համար:
- Հայաստանում ԵՄ առաքելությունը երկու հիմնական առաջադրանք է կատարելու՝
- Աջակցել Հայաստանի և Ադրբեջանի միջև վստահության ամրապնդմանը՝ հետևելով երկու կողմերի կողմից հրադադարի պահպանմանը:
- Տեղերում հրադադարի հետ կապված ռազմական իրադրության վերաբերյալ պարբերական և հատուկ հաշվետվությունների միջոցով ԵՄ առաքելությունը կհետևի իրավիճակին Հայաստանի և Ադրբեջանի սահմանամերձ շրջաններում: Դա հնարավորություն կտա ԵՄ-ին ավելի լավ աջակցել երկու երկրների սահմանային հանձնաժողովներին:
- Առաքելության պատասխանատվության գոտին կլինի Հայաստանի և Ադրբեջանի միջև միջազգայնորեն ճանաչված սահմանը՝ միայն հայկական կողմից:
- Տեղակայվելու են միայն քաղաքացիական դիտորդներ:
- Առաքելության կազմում են մինչև 40 քաղաքացիական դիտորդներ, որոնք տեղակայվելու են երկու ամիս ժամկետով:
- Տեխնիկական գնահատման առաքելության նպատակն էր ճանապարհ հարթել երկրում դիտորդական առաքելության տեղակայման համար: Նրա դերակատարումն էր անհրաժեշտ տեղեկատվության հավաքագրումը, տեղում իրավիճակի գնահատումը, շահագրգիռ կողմերի հետ կապերի հաստատումը:
- Հայաստանում ԵՄ առաքելության արագ տեղակայումն ապահովելու համար տեղակայվում են Վրաստանում ԵՄ առաքելության փորձագետները:
- Հայաստանում ԵՄ առաքելությունը զեկուցելու է Հայաստանի և Ադրբեջանի սահմանամերձ շրջաններում հրադադարի հետ կապված ռազմական իրադրության մասին: ԵՄ առաքելության դիտորդները կհետևեն իրադարձություններին սահմանի երկայնքով, ներառյալ մարդու իրավունքների հետ կապված իրադարձությունները: Նրանք քննչական գործողությունների լիազորություններ չեն ունենալու:
- ԵՄ առաքելության անդամները սահմանին իրավիճակի վերաբերյալ իրենց դիտարկումների մասին կզեկուցեն ԵՄ համապատասխան կառույցներին: Այն կամայական դեր չի ստանձնելու կամ իր դիտարկումների հիման վրա քաղաքական բնույթի եզրահանգումներ չի անելու:
- ԵՄ-ն և ԵԱՀԿ-ն երկու տարբեր առաքելություններ են, որոնք ունեն տարբեր մանդատներ: ԵՄ-ի առաքելությունը կապը պահելու է միջազգային բոլոր կառույցների, այդ թվում՝ ԵԱՀԿ-ի հետ: ԵՄ-ի և ԵԱՀԿ-ի առաքելությունները չեն կրկնում միմյանց աշխատանքը:
