Ազգային խաղ-մրցույթ՝ Արցախում

Ընդհանուր առմամբ  կազմակերպվել է 4 ազգային ավանդական խաղի մրցույթ, որի արդյունքում առաջին տեղն է զբաղեցրել Ասկերանի շրջանի թիմը։

Հայաստանի Հանրապետության կրթության, գիտության, մշակույթի և սպորտի նախարարության աջակցությամբ Արցախիում՝ Ասկերանի շրջանի աստղաշեն համայնքում անցկացվել է «Գուպար» խորագրով ազգային ավանդական խաղերի մրցույթ: Վերջինս կազմակերպվել էր Արցախի «Պատմական միջավայրի պահպանության պետական ծառայություն» ՊՈԱԿ-ի և  «Դիզակ Արտ» մշակութային հասարակական կազմակերպության կողմից։

«Արմենպրես»-ի  հաղորդմամբ՝ մրցույթին մասնակցել է Ասկերանի, Մարտունու, Մարտակերտի, Հադրութի, Քաշաթաղի և Շուշիի և Շահումյանի շրջանները ներկայացնող 7  թիմ:

Մրցույթի կազմակերպիչներից «Դիզակ Արտ» մշակութային ՀԿ գործադիր տնօրեն Երազիկ Հայիրյանը կարևորել է ազգային ավանդական խաղերի վերականգնմանն ու պահպանմանը  միտված այս ձևաչափը։ Ըստ նրա խաղերը ազգայինի պահպանման գաղափարի շուրջ երիտասարդներին համախմբելուն են ծառայում: Բացի այդ, հնարավորություն են ստեղծում մասնակցիների համար ստեղծել միջհամայնքային կապեր և հետագա  համագործակցության հիմքեր։

«Ազգային խաղերը հազարամյակների պատմություն ունեն, իսկ   Արցախում վերջին տարիներին աշխույժ ընթացք է ստացել դրանց վերականգնումն ու կիրառումը նմանատիպ միջոցառումների շրջանակներում: Պետական երիտասարդական ծրագրով  կազմակերպվող  ազգային ավանդական խաղերը մեծ ոգևորությամբ են ընդունվում մասնակիցների և հանրության կողմից»,- ասաց Հայիրյանը։

Արցախի ԿԳՄՍ նախարարի տեղակալ Լեռնիկ Հովհաննիսյանի խոսքով ազգային խաղերն արտացոլում են  հայկական ավանդական կենցաղն ու կենսակերպը։

«Մասնավորապես՝  «Կոխ»-ը ռազմի խաղ է, մյուսները՝ տնտեսական այս կամ այն երևույթին են առնչվում: Այս միջոցառումը  հայրենասիրական դաստիարակության ձևերից է՝  հատկապես ներկա պամաններում, երբ մեր նյութական և  ոչ նյութական ժառանգությունը գտնվում է մեծ մարտահրավերների առջև»,- նշել է  Լեռնիկ Հովհաննիսյանը։

Ընդհանուր առմամբ  կազմակերպվել է 4 ազգային ավանդական խաղի մրցույթ, որի արդյունքում առաջին տեղն է զբաղեցրել Ասկերանի շրջանի թիմը, երկրորդը` Քաշաթաղի, երրորդ տեղը Հադրութի թիմը, որոնք արժանացել են դրամական պարգևների:

Ներկա էր նաև Արցախի կրթության, գիտության, մշակույթի և սպորտի նախարար Անահիտ Հակոբյանը։