Քաջարանի քաղաքապետը շնորհավորական ուղերձ է հղել երեխաների իրավուքների պաշտպանության միջազգային օրվա առթիվ․
Իմ փոքրիկ բարեկամներ,
սրտանց շնորհավորում եմ ձեզ` Երեխաների իրավունքների պաշտպանության միջազգային օրվա կապակցությամբ:
Այսօր ձեր տոնն է, միևնույն ժամանակ հիշեցում, որ մենք՝ ավագներս, պատասխանատու ենք ձեր ճակատագրերի նկատմամբ:
Մենք անում ենք հնարավորը՝ ձեր երջանկության համար, որպեսզի դուք մեծանաք անհոգ, ապահով, լավ կրթություն ստանաք և դառնաք մեր երկրի լիիրավ քաղաքացիներ: Հենարան տալով ձեզ` սովորեցնում ենք լինել բարի, տեսնել գեղեցիկը, գնահատել ազգային և համամարդկային արժեքները:
Ձեզ պաշտպանելով մենք մեր հնարավորություններն այնպես ենք օգտագործում, որ ձեր յուրաքանչյուր օրը լինի բազմազան ու գունագեղ, գորովանքով ու քնքշանքով լի:
Առանձնահատուկ շնորհավորում եմ հանուն հայրենիքի մարտիրոսված մեր քաջորդիների երեխաներին` այս ջերմ ու գեղեցիկ տոնի կապակցությամբ և բոլոր երեխաներին մաղթում առողջություն, ընտանեկան ջերմություն, ուժեղ և ապահով հայրենիք:
Թող անկեղծ ժպիտն ու սերը հարատևեն ձեր կյանքում:
