Թուրքիայի հետ հարաբերությունների կարգավորման հարցում մի շարք հարցերի շուրջ ունենք լայն փոխըմբռնում. Միրզոյան

Շարունակել ենք Թուրքիայի հետ կարգավորման գործընթացը, մի շարք հարցերի շուրջ բավականին լայն փոխըմբռնում ունենք, և ակնհայտորեն արդեն ժամանակն է, որ մենք տեսնենք գետնի վրա կոնկրետ իրականացվող պայմանավորվածություններ: Այս մասին Ազգային ժողովում 2023 թվականի պետական բյուջեի կատարողականի քննարկման շրջանակում ասաց ՀՀ ԱԳ նախարար Արարատ Միրզոյանը:

Անդրադառնալով երկկողմ հարաբերություններին՝ նշեց՝ այստեղ ևս մեր առաջնային ջանքերը և նպատակներն ուղղված են եղել մեր անմիջական հարևանությանը և հարաբերությունների զարգացմանը, ընդգծեց՝ Վրաստանի և Իրանի հետ Հայաստանի հարաբերությունները կարողացել են խորացնել:

Միրզոյանն ընդգծեց՝ Իրանի հետ հարաբերություններում, առաջին հերթին՝ տնտեսական ուղղությամբ, էական ձեռքբերումներ ենք ունեցել, գործուն քայլեր կատարել Ֆրանսիայի, ԱՄՆ-ի, ԵՄ-ի հետ հարաբերությունների զարգացման և խորացման ուղղությամբ:

«Ռուսաստանի հետ մեր հարաբերությունները թերևս ամենաթափանցիկն են: Ըստ էության, հանրությունը և դուք ամենայն մանրամասնությամբ տեղյակ եք գործընթացներին»,- նշեց նախարարը:

Ինչ վերաբերում է եվրոպական առանձին երկրների հետ մեր հարաբերություններին՝ նկատեց՝ նշանակալի ակտիվացում ունենք: Նախարարը հիշատակեց Մեծ Բրիտանիա այցը և ռազմավարական երկխոսության մեկնարկը ՄԹ-ի հետ:

Մյուս ակտիվ ուղղությունների թվում Միրզոյանը հիշատակեց Մերձավոր Արևելքը, շատ չմանրամասնելով հիշեցրեց՝ մենք դիվանագիտական հարաբերություններ ենք հաստատել Սաուդյան Արաբիայի, Բոտսվանայի, Տրինիդադ և Տոբագոյի հետ:

Ինչ վերաբերում է Սաուդյան Արաբիայի հետ հարաբերություններին՝ նախարարն ասաց՝ չի դադարի կրկնել՝ սա մի ջանք էր և նպատակ, որի շուրջ հայ դիվանագիտությունը տասնամյակներով աշխատանք է տարել և վերջնարդյունք չի եղել:

2023-ին Հայաստանը շատ ակտիվորեն շարունակել է և զարգացրել հարաբերությունները Հնդկաստանի, Չինաստանի հետ:

Ինչ վերաբերում է բազմակողմ ձևաչափին՝ նախարարը նկատեց՝ մենք ակտիվ ներգրավվածություն ենք պահել միջազգային մի շարք հարթակներում՝ ՄԱԿ, ԵՄ, ԵԱՏՄ, ՅՈՒՆԵՍԿՕ:

«Շատ կարևոոր է, որ 2023-ին Հայաստանը հաղթել է բոլոր այն հինգ ընտրություններում, որտեղ իր թեկնածությունն առաջադրել է»,- հայտնեց նախարարը:

Ինչ վերաբերում է ՀԱՊԿ-ին, հիշեցրեց՝ Հայաստանն ըստ էության սառեցրել է իր մասնակցությունը:

«Նոր զարգացումներ այստեղ, մեծ հաշվով, չկան 2023 թվականի մասով»,- ասաց Արարատ Միրզոյանը:

2023-ին Հայաստանը դիվանագիտական հարաբերություններ ունեցել է 182 պետության հետ:

Ինչ վերաբերում է 2024-ի անելիքներին, նախարարը հիշեցրեց՝ արդեն ընդունվել են կառավարության որոշումներ Թավրիզում Հայաստանի գլխավոր հյուպատոսություն բացելու, Կիպրոսում դեսպանություն հիմնելու և Սերբիայում դիվանագիտական գրասենյակ բացելու վերաբերյալ: