ՀՀ փոխվարչապետ Տիգրան Խաչատրյանը խորհրդարանում ՀՀ 2023 թ. պետական բյուջեի կատարման տարեկան հաշվետվության քննարկման ժամանակ իր զեկույցի երկրորդ հատվածում անդրադարձավ 2023 թվականին պետբյուջեով իրականացված կապիտալ ծախսերին:
Նրա խոսքով՝ այդ ծախսերի ավելացումը և դրանց որակական բարելավումները ամբողջ տարվա ընթացքում եղել են Կառավարության ուշադրության կենտրոնում և Հայաստանի տնտեսական պոտենցիալի ավելացման հարցում ունեն մեծ նշանակություն:
Հիշեցնելով, որ 2023-ին կապիտալ ծախսերը կազմել են ՀՆԱ-ի 5,2 տոկոսը կամ եղել են 0,6 տոկոսային կետով ավելին, քան 2022-ին, փոխվարչապետը նշեց՝ սա պետբյուջեի կատարման նշանակալի իրադարձություն է:
«Պետական բյուջեի ծախսերը 2023-ին կազմել են 472 մլրդ 600 միլիոն, որը 2022-ի ցուցանիշը գերազանցել է մոտ 92 մլրդ դրամով կամ 24,2 տոկոսով: Հատկապես արագ են աճել տնտեսական և սոցիալական ենթակառուցվածքներում կատարված կապիտալ ծախսերը, որոնք տարվա համար կազմել են 209 մլրդ դրամ՝ 2022-ի նկատմամբ արձանագրելով 37,6 տոկոս աճ:
Կարևոր է նշել նաև, որ այն 2,3 անգամ ավելին է, քան նույն ուղղություններով 2018-ին կատարված կապիտալ ծախսերի մակարդակն է եղել»,- ասաց Տիգրան Խաչատրյանը:
Նրա խոսքով՝ կա ևս մեկ հարց, որը պարզաբանման կարիք ունի:
«Բացի տարբեր ոլորտներում իրականացվող կապիտալ ծախսերը, յուրաքանչյուր տարվա պետական բյուջեով համայնքներին են հատկացվում նպատակային սուբվենցիաներ, որոնց հիմքում զարգացման բնույթի կապիտալ ծախսեր իրականացնելու անհրաժեշտությունն է:
Մասնավորապես, 2023-ին այդպիսի հատկացումների գումարը կազմել է 30,3 մլրդ դրամ, և եթե կապիտալ ծախսերում ներառենք սուբվենցիոն ծրագրերով համայնքային ծրագրերի համաֆինանսավորման հատկացումները, ապա պետական բյուջեի կապիտալ ծախսերի հանրագումարը 2023-ին կկազմեր 240 մլրդ դրամ, իսկ աճը նախորդ տարվա նկատմամբ՝ 40,6 տոկոս:
Փոխվարչապետի խոսքով՝ այս թվերի հիմքում ընկած են տարբեր ոլորտներում, այդ թվում՝ ճանապարհային, ոռոգման, էներգետիկ, կրթական և առողջապահական ենթակառուցվածքների զարգացմանն ուղղված կարևոր ծրագրեր»,- ասաց փոխվարչապետը:
