ՀՀ աշխատանքի և սոցիալական հարցերի նախարարությունից տեղեկացնում են, որ եթե ԼՂ-ից բռնի տեղահանվել եք 2023 թվականին և փնտրում եք աշխատանք, ապա ԼՂ-ից բռնի տեղահանված անձանց զբաղվածության ապահովման պետական աջակցության ծրագրի շրջանակում կարող եք ընտրել հետևյալ երեք հնարավորություններից որևէ մեկը՝
- անցնել 6-ամսյա մասնագիտական ուսուցում՝ ցանկացած մասնագիտությամբ, այդ ընթացքում ստանալ կրթաթոշակ և ուսման վարձի փոխհատուցում.
- անցնել աշխատանքային պրակտիկա, որի ընթացքում ստանալ նաև վարձատրություն.
- համատեղել մասնագիտական ուսուցումն ու վարձատրվող աշխատանքային պրակտիկան։
Ցանկացած հնարավորության ընտրության դեպքում Ձեզ տրվում է աշխատանքի տեղավորման հնարավորություն։
Միջոցառման շրջանակում պետությունը հարկերի փոխհատուցման տեսքով աջակցում է նաև այն գործատուներին, ովքեր աշխատանքի կընդունեն ԼՂ-ից բռնի տեղահանված անձանց։
Ծրագրից օգտվելու համար և՛ գործատուները, և՛ ԼՂ-ից բռնի տեղահանված անձինք կարող են դիմել Միասնական սոցիալական ծառայության ցանկացած տարածքային կենտրոն։
Նախարարությունը ներկայացրել է ծրագրի վերաբերյալ առավել հաճախ հնչող 5 հարցերը.
ՀԱՐՑ 1։ 16 տարեկան եմ․ կարո՞ղ եմ օգտվել ծրագրի մասնագիտական ուսուցման և աշխատանքի տեղավորման բաղադրիչից։
ՊԱՏԱՍԽԱՆ։ Այո՛, կարող եք օգտվել ինչպես տվյալ բաղադրիչից, այնպես էլ ծրագրի մյուս երկու բաղադրիչներից։ Առհասարակ, ծրագրից կարող են օգտվել 16-ից մինչև 63 տարեկան անձինք։
ՀԱՐՑ 2։ Վարձու աշխատող, քաղաքացիաիրավական պայմանագրով ծառայություն մատուցող կամ աշխատանքներ կատարող անձը կամ անհատ ձեռնարկատերը կարո՞ղ է օգտվել ծրագրից։
ՊԱՏԱՍԽԱՆ։ Ո՛չ, ծրագիրը նախատեսված է ԼՂ-ից բռնի տեղահանված այն հայրենակիցների համար, ովքեր տեղահանվել են 2023 թ․ սեպտեմբերին և որպես գործազուրկ հաշվառվել են Միասնական սոցիալական ծառայության տարածքային կենտրոնում։
ՀԱՐՑ 3։ Եթե հեռակա ուսուցմամբ սովորում եմ բարձրագույն ուսումնական հաստատությունում, կարո՞ղ եմ որպես շահառու ընդգրկվել տվյալ ծրագրում։
ՊԱՏԱՍԽԱՆ։ Այո՛, հեռակա ուսուցման դեպքում՝ կարող եք օգտվել ծրագրից։ Առկա ուսուցմամբ որևէ ուսումնական հաստատությունում սովորողները չեն կարող օգտվել ծրագրից, քանի որ համարվում են զբաղվածություն ունեցող անձինք։
ՀԱՐՑ 4։ Ծրագրի շրջանակում կարո՞ղ եմ, оրինակ՝ ծրագրավորման ոլորտի վերաբերյալ համապատասխան դասընթացներ անցնել։
ՊԱՏԱՍԽԱՆ։ Այո՛, կարող եք, եթե գործատուի կողմից ներկայացված թափուր աշխատատեղի համալրման համար պահանջվում է տվյալ մասնագիտությամբ հմտություններ և կարողություններ ունեցող անձ։
ՀԱՐՑ 5։ Եթե ԼՂ-ից տեղահանվել եմ 2020 թվականին, կարո՞ղ եմ դառնալ ԼՂ-ից բռնի տեղահանված անձանց զբաղվածության ապահովման պետական աջակցության ծրագրի շահառու։
ՊԱՏԱՍԽԱՆ։ Ո՛չ, տվյալ դեպքում ծրագրից չեք կարող օգտվել, քանի որ ծրագրի շահառուները 2023 թ․ սեպտեմբերին տեղահանված անձինք են։ Սակայն հանրապետությունում առկա թափուր աշխատատեղերին կարող եք ծանոթանալ e-work.am հարթակում` https://e-work.am/, որի միջոցով ոչ միայն կարող եք ստեղծել Ձեր ինքնակենսագրականը, այլև գտնել Ձեր մասնագիտական կարողություններին համապատասխան աշխատանք և ուղիղ կապ հաստատել գործատուի հետ։
