Նշենք, որ Լեռնային Ղարաբաղից բռնի տեղահանվածների բնակարանային ապահովման ծրագրի շահառու դառնալու համար արցախցիները պետք է ՀՀ քաղաքացիություն ստանան, իսկ քաղաքացիություն ստացածների թիվը մինչ օրս չի գերազանցում 2000–ը։
Լեռնային Ղարաբաղից բռնի տեղահանված ընտանիքների բնակարանային ապահովման պետական աջակցության ծրագրին դիմած 594 ընտանիքից (1967 անձ) շուրջ 30–ի դիմումն օգոստոսի 26–ի դրությամբ բավարարվել է, և նրանք արդեն ստացել են հավաստագիր։ : Sputnik Արմենիայի գրավոր հարցմանն ի պատասխան հայտնել են ՀՀ աշխատանքի և սոցիալական հարցերի նախարարությունից։
Ավելի վաղ հայտնել էինք, որ մայիսի 16–ի նիստի ժամանակ ՀՀ կառավարությունը հաստատեց «Լեռնային Ղարաբաղից բռնի տեղահանված ընտանիքների բնակարանային ապահովման պետական աջակցության ծրագիրը և ՀՀ առանձին բնակավայրերի ցանկերը հաստատելու մասին» որոշումը։ Ծրագրի շահառուների էլեկտրոնային հայտերի ընդունումը մեկնարկեց 2024 թ. հունիսի 15–ից։
Sputnik Արմենիան խնդրել էր հայտնել նաև, թե ծրագրում ընդգրկված հատկապես ո՞ր բնակավայրերի նկատմամբ շահառուներն ունեն մեծ հետաքրքրվածություն։ Նախարարությունից նշել են, որ հավաստագրման գործընթացում հնարավոր չէ ստանալ վիճակագրություն նախընտրելի բնակավայրերի մասին։
«Այդ տեղեկատվությունը հնարավոր կլինի ստանալ հավաստագրերի իրացումից հետո, քանի որ շահառուների նախապատվությունները կարող են փոփոխվել մինչ վերջնական որոշում կայացնելը»,– ասված է գերատեսչության պատասխանի մեջ։
Նշենք, որ Լեռնային Ղարաբաղից բռնի տեղահանվածների բնակարանային ապահովման ծրագրի շահառու դառնալու համար արցախցիները պետք է ՀՀ քաղաքացիություն ստանան, իսկ քաղաքացիություն ստացածների թիվը մինչ օրս չի գերազանցում 2000–ը։
Ըստ ՀՀ կառավարության հաստատած ծրագրի` պոտենցիալ շահառուները նախնական հաշվարկով 25 000 ընտանիքներ են։ Վերջնական թիվը պետք է ճշգրտվի ծրագրի իրականացման ընթացքում` ըստ ստացված դիմումների քանակի։
Ծրագրի շահառու դառնալու համար արցախցիները պետք է հայտ ներկայացնեն, որից հետո շահառու ընտանիքին պետք է հատկացվի բնակարանի գնման հավաստագիր` ընտանիքի յուրաքանչյուր անձի հաշվով` 3-5 մլն դրամի չափով` կախված բնակարանի կամ տան գտնվելու տարածքում գույքի շուկայական արժեքից։
