Հանրապետության մարզերում 2023 թվականի բյուջեի միջոցներով կվերանարոգվի 9 պոլիկլինիկաներ և 20 գյուղական ամբուլատորիա: Այս մասին այսօր«Արմենպրես»–ի մամուլի սրահում հրավիրված ասուլիսում տեղեկացրեց ՀՀ առողջապահության նախարարի տեղակալ Արտակ Ջումայանը՝ հավելելով, որ վերանորոգումը չի ենթադրում միայն շենքային պայմանների բարելավում:
«Ընտրված պոլիկլինիկաները, ամբուլատորիաները Գյումրիում են, Վանաձորում, Նոր Հաճնում, Արտաշատում, Արմավիրում և այլն: Հաստատություններն ընտրվել են՝ հաշվի առնելով մի քանի գործոններ՝ կցագրված բնակչության քանակ, առկա վիճակ, հրատապություն: Վերանորոգման հետ միասին սպասվում է պոլիկլինիկաների, ամբուլատորիաների գույքի, սարքավորումների ամբողջական թարմացում: Այս պահին էլ մենք մարզային տարբեր հաստատություններում կատարում ենք գույքի, սարքավորումների թարմացում: Այսօր կարող ենք ասել, որ չունենք 60-70 թվականների ռենտգեն սարքավորումներ, որոնք կային 1-2 տարի առաջ»,-ասաց Արտակ Ջումայանը:
Թե կոնկրետ երբ պոլիկլինիկաներն ու գյուղական ամբուլատորիաները վերջնական պատրաստ կլինեն, Արտակ Ջումայանը դժվարացավ պատասխանել, միայն ավելացրեց, որ նախնական տվյալներով 1.5 տարվա ընթացքում պատրաստ կլինեն:
