Եվրոպայի անվտանգության և համագործակցության կազմակերպությունը (ԵԱՀԿ) ճգնաժամի մեջ է, քանի որ հեռացել է իր նախնական խնդիրներից: Այդ մասին ՌԻԱ Նովոստիին հայտնել է ՌԴ ԱԳՆ Համաեվրոպական համագործակցության դեպարտամենտի տնօրենի պաշտոնակատար Իգոր Կապիրինը․
«Եվրոպայում չկա համագործակցություն, չկա անվտանգություն և չկա հնարավորություն քննարկելու անգամ դրանց բացակայությունը», – ընդգծել է նա:
Կապիրինի խոսքով՝ նախկին գործընկերները չեն ցանկանում երկխոսել, թեև ԵԱՀԿ-ն նման հնարավորություն է ընձեռում: Որպես օրինակ նա բերել է Պրահայի տնտեսական-բնապահպանական համաժողովը, որտեղ Ռուսաստանի ներկայացուցիչներին չի տրամադրվել մուտքի արտոնագիր։
ՌԴ ԱԳՆ Համաեվրոպական համագործակցության դեպարտամենտի տնօրենի պաշտոնակատարը նշել է, որ կազմակերպության ձևաչափն օգտակար է գործընկերների հետ փոխգործակցության համար:
Ավելի վաղ հայտնի էր դարձել, որ Ռուսաստանը չի պատրաստվում դուրս գալ ԵԱՀԿ-ից՝ չնայած ճնշումներին: Դա պայմանավորված է նրանով, որ Մոսկվային անհրաժեշտ է երկխոսության հարթակ, այդ թվում՝ ռազմավարական գործընկերների դիրքորոշումները լսելու և հաշվի առնելու համար։
