Եվրամիությունը դատապարտում է ՄԱԿ-ի առաքելությունների դեմ ուղղված բոլոր հարձակումները, հայտարարել է Միության արտաքին քաղաքականության պատասխանատու Ժոզեպ Բորելը` ի պատասխան Լիբանանում ՄԱԿ-ի խաղաղապահ առաքելության վրա Իսրայելի պաշտպանության ուժերի հարձակումներին, հայտնում է Reuters-ը:
«ՄԱԿ-ի խաղաղապահների դեմ նման հարձակումները միջազգային իրավունքի կոպիտ խախտում են և բացարձակապես անընդունելի, դրանք պետք է անհապաղ դադարեցվեն»,- ասել է Բորելը՝ ԵՄ անունից կիրակի երեկոյան հրապարակված հայտարարության մեջ:
«Մենք անհապաղ սպասում ենք Իսրայելի իշխանությունների բացատրություններին և մանրակրկիտ հետաքննությանը UNIFIL-ի դեմ հարձակումների վերաբերյալ, որը հիմնարար դեր է խաղում Հարավային Լիբանանի կայունության ապահովման հարցում»,- շեշտել է եվրոպացի դիվանագետը։
Իսրայելը վիճարկել է ՄԱԿ-ի որոշ տեղեկություններ Լիբանանում UNIFIL-ի խաղաղապահների հետ կապված միջադեպերի վերաբերյալ: Վարչապետ Բենիամին Նեթանյահուն ասել է, որ նրանք «մարդկային վահաններ» են «Հըզբոլլահի» զինյալների համար ռազմական գործողությունների աճի ժամանակ:
Հայտարարության մեջ Բորելը նշել է, որ ԵՄ-ն նաև «խորապես մտահոգված է» Իսրայելի տարածքի վրա շիա արմատական «Հըզբոլլահ» շարժման հրթիռային հարձակումներով։ Նա կոչ է արել Լիբանանում իրականացնել ՄԱԿ-ի Անվտանգության խորհրդի 1701 բանաձևը՝ դադարեցնել ռազմական գործողությունները Իսրայելի և «Հըզբոլլահի» միջև:
