Մարզերից և Երևանի քաղաքապետարանից հավաքագրված տեղեկությունների համաձայն` անբավարար տեխնիկական վիճակում է գտնվում Հայաստանի մոտ 19 000 բազմաբնակարան շենքերի 3.2 տոկոսը։ Այս թիվն աճման միտում ունի։ Ազգային ժողովում «Քաղաքաշինության մասին» օրենքում լրացում կատարելու մասին նախագծի քննարկման ժամանակ այս հայտարարությունն արեց ՀՀ քաղաքաշինության կոմիտեի նախագահ Արմեն Ղուլարյանը, տեղեկացնում է Sputkin Արմենիան։
«Անբավարար տեխնիկական վիճակում են գտնվում հիմնականում Երևանի (120), Լոռու (149) և Շիրակի (123) մարզերի շենքերը։ Բացի այդ, Հայաստանում առկա է քանդման ենթակա վթարային 4-րդ աստիճանի 1200-ից ավելի անհատական բնակելի տուն։ Հարցն այն է, որ հետխորհրդային տարիներին բնակֆոնդի անվտանգ շահագործման ուղղությամբ համակարգված լայնածավալ աշխատանքներ չեն իրականացվել։ Բազմաբնակարան շենքերի սեփականատերերը ևս պարտադիր նորմերը չեն պահպանել անհրաժեշտ ծավալով և որակով»,– ասաց Ղուլարյանը։
Վերջինիս խոսքով՝ այժմ կառավարության քաղաքականությունն այս ոլորտում իրականացվում է երեք հիմնական ուղղությամբ։ Առաջինը բնակարանային ֆոնդի խնդիրների լուծումն է, որն արդեն գտնվում է անբավարար վիճակում։ Երկրորդը շենքերի անվտանգ շահագործման պահպանման հարցերն են, երրորդը՝ բազմաբնակարան շենքերի կառավարման բարելավման հարցը։
Օրենսդրական փոփոխությունների նախագիծը վերաբերում է հարցերի առաջին խմբին։ Նախագծի ընդունմամբ կառավարությունը կստանա վթարային շենքերի քանդման հետ կապված բոլոր կանոնակարգերի սահմանման լիազորություն։
